Në kuadër të prezantimit të Kapitullit të Dytë për Tetovën, Albi Qamili, bartës liste i koalicionit VLEN për Tetovën, së bashku me kryetarin aktual dhe kandidatin për mandatin e dytë, Bilall Kasami, kanë shpalosur një nga projektet më transformuese për qytetin – transportin publik falas dhe të zgjeruar.
Tetova po ecën drejt standardeve evropiane dhe në mandatin e ardhshëm, pritet të realizohet një sistem modern dhe pa pagesë i transportit publik, që synon të lehtësojë jetën e përditshme të qytetarëve dhe të mbrojë buxhetin e familjeve.
Sipas planit, do të sigurohen 10 automjete të reja elektrike – 5 autobusë dhe 5 minibusë – të cilët do të mbulojnë jo vetëm qytetin, por edhe fshatrat e Malësisë së Tetovës, duke mundësuar lidhje të rregullt dhe të qëndrueshme për të gjithë.
Po ashtu, do të ndërtohet një stacion i ri modern i autobusëve në BU 58, i cili do të jetë i sigurt dhe plotësisht funksional. Projekti përfshin edhe krijimin e nënstacioneve të reja “ECO – Green” dhe korsi të dedikuara për transport publik dhe biçikleta, si pjesë e vizionit për një qytet më të gjelbër dhe më të organizuar.
“Ky është hapi i radhës drejt një Tetove evropiane – të zhvilluar, të qasshme dhe të qëndrueshme,” u theksua gjatë prezantimit të projektit. Ky plan është pjesë thelbësore e agjendës së qeverisjes së ardhshme të Kasamit dhe ekipit të tij, duke vendosur Tetovën në një rrugë të qartë drejt modernizimit dhe zhvillimit të balancuar urban e rural.
