Sofje, 20 maj – Partneriteti në NATO është edhe një mundësi tjetër për të treguar forcën e Aleancës dhe për të marrë pjesë në baza të barabarta në procesin e garantimit të mbrojtjes dhe sigurisë sonë, tha ndër të tjera ministrja e Mbrojtjes së Maqedonisë të Veriut Slavjanka Petrovska në programin e politikës së jashtme të BNT “Bota dhe ne”.
Sipas ministres të Mbrojtjes të Maqedonisë së Veriut, siç njofton korrespondenti i MIA-s nga Sofja, pushtimi rus i Ukrainës fsheh rreziqe të caktuara në rajonin e Ballkanit Perëndimor, të cilat shtetet anëtare të rajonit duhet t’i parashikojnë dhe të jenë të përgatitur për t’iu përgjigjur.
“Nëse deri para disa vitesh Republika e Maqedonisë së Veriut, e cila është pjesë e këtij rajoni, dëshironte të mbrohet, tani është pjesë e mbrojtjes dhe garanton sigurinë rajonale. Në Bruksel po mbahet mbledhja e Komitetit ushtarak të NATO-s, ku një nga çështjet që do të diskutohet është formimi i grupit luftarak në krahun lindor të Aleancës, i cili do të jetë në Bullgari nën komandën italiane”, tha ministrja Petrovska.
Ajo shtoi se Maqedonia e Veriut ka vullnet politik të marr pjesë në të, ndërsa ekziston edhe mbështetje publike.
Sipas saj, bashkëpunimi mes Bullgarisë dhe Maqedonisë së Veriut në fushën e mbrojtjes është në nivel të shkëlqyer dhe do të thellohet. Ministrja Petrovska theksoi se Maqedonia e Veriut është shumë e kënaqur me shkollimin e oficerëve të saj në universitetet ushtarake bullgare dhe veçanërisht në Akademinë ushtarake në Sofje.
Për momentin, Maqedonia e Veriut është shumë afër arritjes së një marrëveshjeje për edukimin dhe ritrajnim e mjekëve ushtarakë dhe personelit të Akademisë Mjekësore – Ushtarake në Sofje.
Ministrja e Mbrojtjes e Maqedonisë së Veriut, Slavjanka Petrovska, informoi se ka ftuar ministrin e Mbrojtjes të Bullgarisë Dragomir Zakov që të vizitojë Shkupin, si dhe njësitë e dy armatave për të kryer stërvitje të përbashkëta në bazën në Krivolak.
