Kryetari i shoqatës “Jehona e Malësisë”, Agron Dedivanaj, ishte i ftuar në emisionin “Studio e Hapur” në TV Boin, ku foli gjerësisht për Fondin humanitar “Babë dhe Bijë”, një nismë që ka për synim mbështetjen e fëmijëve me autizëm dhe familjeve të tyre.
Dedivanaj theksoi se ky fond nuk është thjesht një aksion bamirësie, por një mision i vërtetë kombëtar, që lidh traditën shqiptare me solidaritetin, duke dëshmuar se diaspora nuk është asnjëherë e shkëputur nga rrënjët e saj. Sipas tij, përmes këtij angazhimi, kultura dhe krenaria kombëtare kthehen në mbështetje konkrete dhe të prekshme për ata që kanë më shumë nevojë.
“Kam pasur kënaqësinë që, së bashku me përfaqësues të tjerë të shoqatave atdhetare nga SHBA-ja, të jem pjesë e këtij emisioni dhe të ndaj me publikun rëndësinë e Fondit ‘Babë dhe Bijë’. Ky është një projekt që na bashkon të gjithëve, sepse përmes tij ndihmojmë fëmijët me autizëm të kenë më shumë mundësi për zhvillim dhe përfshirje në shoqëri,” – u shpreh Dedivanaj.
Ai bëri të ditur se deri tani janë mbledhur fonde të konsiderueshme, të cilat kanë bërë të mundur financimin e terapive dhe mbështetjes së specializuar për disa fëmijë në Komunën e Tuzit. Ky hap, sipas tij, është vetëm fillimi i një tradite që synohet të vazhdojë çdo vit, për të sjellë ndryshime pozitive dhe afatgjata në jetën e fëmijëve dhe familjeve të tyre.
Dedivanaj nënvizoi gjithashtu rëndësinë e bashkëpunimit mes diasporës dhe komunitetit në vendlindje, duke thënë se vetëm duke forcuar lidhjet kombëtare e humane mund të krijohet një e ardhme më e drejtë dhe më e barabartë për çdo fëmijë.
“Ky fond është një thirrje për unitet. Vetëm të bashkuar, me zemër e përkushtim, mund të ndërtojmë shpresë dhe të ofrojmë mbështetje atje ku nevoja është më e madhe,” – shtoi ai.
Në fund, kryetari i shoqatës “Jehona e Malësisë” ftoi qytetarët dhe diasporën shqiptare që të kontribuojnë dhe të bëhen pjesë e kësaj nisme, duke i drejtuar edhe tek emisioni i plotë në TV Boin për të ndjekur bisedën e plotë dhe detajet rreth aktivitetit.
