Kryetari i Bashkimit Demokratik për Integrim, Ali Ahmeti, ka zhvilluar sot një takim lamtumirës me ambasadoren e Zvicrës në vend, znj. Veronik Ulman, në selinë qendrore të BDI-së. Takimi u zhvillua në një atmosferë miqësore dhe të përzemërt, duke reflektuar marrëdhënien e qëndrueshme dhe bashkëpunimin e frytshëm ndërmjet Zvicrës dhe BDI-së ndër vite.
Ali Ahmeti falënderoi ambasadoren Ulman për angazhimin e saj të palodhshëm dhe mbështetjen e parezervë që ajo dhe shteti zviceran i kanë dhënë Maqedonisë së Veriut në rrugën drejt zhvillimit demokratik, stabilitetit institucional dhe integrimit euroatlantik.
“Znj. Ulman ka qenë gjithmonë një zë konstruktiv dhe një aleate e vërtetë e vendit tonë dhe e përpjekjeve tona politike për ndërtimin e një shoqërie të drejtë dhe gjithëpërfshirëse. Jam mirënjohës për bashkëpunimin e sinqertë dhe profesional gjatë mandatit të saj si ambasadore,” theksoi Ahmeti.
Gjatë takimit, u ritheksua përkushtimi i palëve për të ardhmen evropiane të Maqedonisë së Veriut, me theks të veçantë në rëndësinë e respektimit dhe zbatimit të Marrëveshjes së Ohrit, Marrëveshjes së Prespës dhe Marrëveshjes për Fqinjësi të Mirë, si parakushte për stabilitetin afatgjatë dhe integrimin e suksesshëm në strukturat euroatlantike.
“Partneriteti me Zvicrën ka qenë gjithmonë i bazuar në vlera të përbashkëta: demokraci, barazi, zhvillim të qëndrueshëm dhe drejtësi. Kjo mbështetje ka pasur një rol të rëndësishëm në reformat dhe proceset transformuese në vendin tonë,” nënvizoi kryetari i BDI-së.
Në fund të takimit, Ali Ahmeti i uroi znj. Ulman shëndet, suksese dhe përmbushje të reja në angazhimet e saj të ardhshme, duke i bërë të qartë se dera e BDI-së do të mbetet gjithmonë e hapur për miq si ajo.
“Në BDI, znj. Ulman do të ketë gjithmonë miq të mirë dhe një derë të hapur për bashkëpunim dhe mirëkuptim – ashtu siç ka qenë gjatë gjithë mandatit të saj në vendin tonë,” përfundoi Ahmeti.
