Shkup, 22 Tetor – Aleanca për Shqiptarët ka reaguar ndaj deklaratës së sotme të lideri të VMRO – DPMNE-së, Hristijan Mickoski, i cili tha se nëse flitet për flitet për normën 20 përqind, duhet të flitet edhe për normat “badenter” dhe “balancer”. Partia shqiptare tha se, hedh poshtë çdo kushtëzim i cili, siç thuhet në reagim, i luhat themelet e shtetit tonë, të ndërtuar mbi parimet e demokracisë konsociative.
Kushtëzimet e tilla ASH i konsideron “si politikë ditore për përdorim brendapartiak, për të ruajtur karrigen përballë sfidave që janë përtej Maqedonisë së Veriut dhe Evropës”.
“Formulimi “gjuha që e flasin 20% e popullsisë” nuk ka të bëjë me politika ditore, por me një definicion fyes të gjuhës shqipe që urgjentisht duhet të hiqet. Kjo do të rrisë kohezionin e brendshëm shoqëror dhe ndëretnik dhe do të bëjë Maqedoninë e Veriut edhe më të mirë, edhe më të fortë dhe vend që përqafon vlerat evropiane të diversitetit gjuhësor dhe kulturor. Për ne, është njësoj fyese kur gjuhës së bashkëqytetarëve tonë i referohen si gjuha maqedonasoveriore apo sllavomaqedone, e ndonjëherë edhe ndryshe. Andaj, problemin e 20 përqindëshit z. Mickoski dhe të tjerët duhet që njëherë e përgjithmonë ta kuptojnë drejtë, duke u nisur nga vetëvetja dhe assesi të ngatërrojnë opinioni duke krijuar amalgame me Balanserin, i cili është mjet planifikimi për punësime në sektorin publik për të arritur obligimin kushtetues për përfaqësim adekuat të bashkësive”, thanë nga ASH.
Në lidhje me badenterin, nga kjo parti u shprehën se, është standard evropian për ruajtje të paqes dhe stabilitetit që u vendos në republikat e ish bllokut komunisit pas tragjedive të mëdha siç ishin luftërat në ish Jugosllavi.
“Ky mekanizëm mbanë emrin e ideatorit të tij, Robert Badenter, ish ministri i drejtësisë dhe ish kryetari i gjykatës kushtetuese të Francës, apo fanari i iluminizmit dhe demokracisë evropiane. Çdo shkelje e këtij mekanizmi të demokracisë konsociative do të ishte retrograd dhe do të sillte pasoja që askush nga ne nuk do t’i dëshironte. Nëse ky votim i dyfishtë për dikë është “problematik”, duhet të kihet parasysh se shumë shtete të ngjashme me tonin e kanë rregulluar këtë çështje me parlament dydhomësh, gjë që do duhej të vendosej në tavolinë nëse hapet një debat i tillë në të ardhmën”, thuhet në reagimin e ASH.
Ndryshe, Mickoski sot duke komentuar deklaratën e djeshme të kryetarit të ASH-së, Arben Taravari, i cili tha se do të mbështesin ndryshimet kushtetuese vetëm nëse pranohet kushti për ndryshimin e definimin të 20%, që i referohet gjuhës shqipe në Kushtetutë, tha se, nëse flitet për normën 20 përqind, duhet të hiqen edhe “badenteri” dhe “balanceri”.
