Kryeministri i Izraelit, Benjamin Netanyahu, shmangu hapësirën ajrore franceze gjatë udhëtimit të tij drejt Shteteve të Bashkuara për të marrë pjesë në Asamblenë e Përgjithshme të OKB-së.
Në vend që të ndjekë rrugën klasike (Greqi – Itali – Francë), avioni e anashkaloi Francën dhe pjesën tjetër të Evropës Qendrore, duke zgjedhur një itinerar më jugor.
Sipas gazetarit izraelit Amichai Stein, manovra e itinerarit është bërë për të shmangur çdo rrezik diplomatik apo ligjor që mund të lindte nga kalimi përmes vendeve që e njohin juridiksionin e ICC-së.
Itinerari i ri është më i gjatë dhe shton rreth 600 kilometra në udhëtim, sqaron gazetari Avi Scharf.
Netanyahu u nis herët të enjten për një vizitë diplomatike në Shtetet e Bashkuara për t’iu drejtuar Asamblesë së Përgjithshme të OKB-së në New York dhe për t’u takuar me presidentin Donald Trump në Shtëpinë e Bardhë.
Para nisjes së tij, Netanyahu tha se do të diskutonte me Trump “nevojën për të përmbushur qëllimet e luftës – për të kthyer të gjithë pengjet tona, për të mposhtur Hamasin dhe për të zgjeruar rrethin e paqes që na është paraqitur pas fitores historike në Operacionin Rising Lion dhe fitoreve të tjera që kemi arritur”, duke iu referuar luftës 12-ditore të Izraelit me Iranin.
Netanyahu shtoi se në fjalimin e tij në OKB ai planifikon “të denoncojë udhëheqësit të cilët, në vend që të dënojnë vrasësit, duan t’u japin atyre një shtet në zemër të Tokës së Izraelit. Kjo nuk do të ndodhë”.
