Çdo ditë dalin prova të reja që konfirmojnë se hetimi për tragjedinë në Koçan nuk është një proces profesional apo i pavarur, por një proces politikisht i dirigjuar. Ajo që po shohim nuk është një hetim, por një farsë e mirëorganizuar për të mbrojtur fajtorët e vërtetë. 59 jetë të reja u shuan në një tragjedi të tmerrshme, ndërsa sistemi, në vend që të mbajë përgjegjës ata që e lejuan këtë objekt të funksionojë jashtë çdo rregulli, ata që injoruan denoncimet dhe paralajmërimet, po bën gjithçka për të gjetur dikë tjetër që t’ia faturojë fajin.
Faktet janë gjithnjë e më të qarta: disa profesionistë brenda policisë së Koçanit nuk mund të heshtnin përballë shkeljeve të hapura dhe kishin dërguar informacione të shkruara për problemet në objektin PULS. Këto dokumente janë problemi më i madh për Qeverinë dhe strukturat e saj policore, sepse nuk mund të injorohen.
Pikërisht për këtë arsye, këto struktura, me mbështetjen e Qeverisë, po punojnë ditë e natë për të zbatuar planin e tyre monstruoz për të zhvendosur fajin kudo tjetër, përveçse aty ku është me të vërtetë.
Është e qartë se gjithë zinxhiri komandues i policisë ishte në dijeni për të miturit që festonin pas mesnate, për përleshjet e vazhdueshme, për shpërndarjen e rregullt të drogës, për shkeljet e sigurisë, për kushtet e mjerueshme në të cilat operonte objekti dhe madje edhe për kaosin me parkimin.
E dinin komandantët në Koçan, drejtuesit në Shtip, shefat e Byrosë për Siguri Publike. Gjithçka ishte e dokumentuar, e arkivuar dhe e shpërndarë në të gjithë zinxhirin komandues të policisë.
Në vend që të merrnin masa, policia në mars të vitit 2023 lëshoi dokumente që ndihmuan pronarin e PULSE të siguronte licencën. Në vend që ta mbyllnin objektin, i dhanë mburojë ligjore.
Por më shumë se kaq: objekti punoi për një vit të tërë pa licencë fare dhe të gjitha institucionet e dinin këtë.
Jo vetëm që nuk ndërhynë, por lejuan renovimin, organizimin e festave partiake dhe u pengua që Drejtoria e të Ardhurave Publike (DAP) ta mbyll atë.
Tani, pas tragjedisë, të njëjtët persona që drejtonin këto institucione janë ata që drejtojnë edhe hetimin. Qëllimi i tyre kryesor nuk është të gjejnë të vërtetën, por të mbrojnë veten. Strukturat policore, me ndihmën e Qeverisë, po krijojnë një histori të re ku asnjë drejtues policor, asnjë shef, asnjë komandant nuk është fajtor.
Përkundrazi, akuzohet një ish-ministër i ekonomisë, një person që nuk ka shkelur kurrë në Koçan dhe që nuk ka pasur asnjë kompetencë për inspektimin e objekteve apo për kontrollin e lokaleve.
Këtu shfaqet monstruoziteti i këtij plani.
Me një cinizëm të skajshëm, jo vetëm që po bëhet përpjekje për të fshehur të vërtetën dhe për të mbrojtur fajtorët e vërtetë, por po synohet të fajësohen padrejtësisht ish-zyrtarë dhe përfaqësues të opozitës, për të ndërtuar një skenar që u shkon për shtat pushtetarëve.
Është e qartë se Qeveria nuk kërkon drejtësi, por alibi.
Kjo nuk mund të heshtet dhe prandaj kërkojmë publikisht:
• Pezullimin e menjëhershëm të gjithë zinxhirit komandues në MPB dhe Byronë për Siguri Publike, të cilët e dinin për problemet në PULS, por nuk vepruan.
• Një hetim të pavarur, jashtë duarve të atyre që lejuan këtë tragjedi, për të zbuluar kush i dha mbrojtje këtij objekti.
• Hapjen e një procesi të ri kundër të gjithë atyre që po punojnë aktivisht për të fshehur të vërtetën dhe për të fabrikuar akuza monstruoze për të mbrojtur fajtorët e vërtetë.
Nuk do të heshtim dhe do të kërkojmë përgjigje deri në fund, sepse nuk mund të lejojmë që kjo tragjedi të mbulohet me gënjeshtra dhe manipulime.
Drejtësia duhet të vihet në vend!i