Shkup, 23 prill – Në tremujorin e parë kemi pasur inflacion real prej 7,7 për qind. Në përgjithësi, në këtë periudhë bëhet fjalë për inflacion të importuar dhe do të varet shumë se si do të lëvizin çmimet në tregjet evropiane dhe si do të reflektojë edhe në vendin tonë. Po marrim masa për ta zbutur atë efekt dhe ato tashmë po japin rezultate, thotë për Zërin e Amerikës, ministri i Financave Fatmir Besimi, i cili në Uashington merr pjesë në takimet pranverore të FMN-së dhe të Bankës Botërore.
Besimi konsideron se pasiguria më e madhe është nëse dhe sa do të vazhdojë lufta në Ukrainë.
“Të gjitha projeksionet, i ashtuquajtur “korrigjim në rënie”, si rrezik që ekziston, nëse lufta vazhdon të gjitha këto efekte – do të vazhdojnë të ndihen në ekonominë tonë. Çdo krizë që vazhdon, lodhet. Shpresojmë që në këtë periudhë të merren të gjitha masat jo vetëm nga ne, por edhe nga Evropa, nga institucionet financiare ndërkombëtare, se si të përshtatemi me skenarë të tillë. FMN-ja tashmë ka bërë të ditur se ka instrumente të reja për të parashikuar një situatë të re në të ardhmen”, thotë Besimi.
Lufta në Ukrainë dhe impakti nga sanksionet e bashkësisë ndërkombëtare kundër Rusisë, ndaj të cilës iu bashkuam edhe ne si anëtare e NATO-s dhe anëtare e ardhshme e BE-së, ndihet edhe tek ne, veçanërisht sa i përket çmimeve të energjisë dhe ushqimeve.
“Në planin afatmesëm dhe afatgjatë, varësisht se sa do të zgjasë lufta, implikime të tilla do të ndikojnë edhe tek ne. Duke supozuar se lufta në Ukrainë përfundon nesër, gjërat nuk do të ndryshojnë brenda natës. Do të duhet pak kohë që ekonomia të përshtatet në një rrugë normale. Tashmë jemi duke përgatitur plane afatmesme se si të përshtatemi me situatën e re dhe ekonomia jonë të vazhdojë të forcohet”, deklaroi Besimi.
Për atë nëse në rast të thellimit të luftës në Ukrainë, ka mundësi të shtyrjes së përkohshme të detyrimeve kreditore të qytetarëve dhe kompanive, duke ndjekur shembullin e një mase të tillë në fillim të pandemisë globale me Kovid-19, ministri thotë se një gjë e tillë aktualisht nuk mendohet.
“Kriza ekonomike me inflacion është shumë e ndryshme nga ajo e krizës shëndetësore me pandeminë, kur kishte një stagnim të plotë të prodhimit dhe pa aktivitet ekonomik fare. Tani situata është e kundërt, ka aktivitet ekonomik, por çmimet po rriten. Këto janë lloje të ndryshme të krizave”, thekson Besimi.
