Natën e kaluar, rreth orës 03:00, vetura e Gjorgji Galetanovskit – Çombe, kryetar i degës së LSDM-së në Shkup dhe ish-drejtor i Kopshtit Zoologjik, u dogj plotësisht.
Automjeti ishte i parkuar para ndërtesës ku banon në komunën Kisella Vodë. Qytetarët dëgjuan shpërthime të gomave të thyera, ndërsa ekipi i zjarrfikësve ndërhyri shpejt dhe e shuajti zjarrin. Galetanovski konfirmoi ngjarjen.
– Po, makina ime u dogj plotësisht. Nuk jam grindur me askënd dhe as nuk më ka kërcënuar dikush. Çdo nder për zjarrfikësit që arritën brenda tre minutave dhe zjarri nuk i përfshiu shtëpitë. I bëj apel ministrit dhe Ministrisë së Punëve të Brendshme që sa më shpejt të gjejnë autorin, jo për shkak të humbjes financiare, por për një jetesë të qetë në Shkup dhe për gjithë qytetarët. Ka kamera rreth e qark, shpresojmë që qetësia të rikthehet, shkroi Galetanovski në rrjetet sociale.
Reagoi LSDM:
– LSDM dënon ashpër këtë akt kriminal dhe djegien e makinës së kryetarit të Organizatës së Qytetit, Gjorgji Galetanovski. Me ardhjen në pushtet të VMRO-DPMNE-së, siguria e qytetarëve është seriozisht e rrezikuar. MPB, në vend që të merret me mënyrat se si personat e afërt me VMRO-DPMNE marrin tenderë milionësh, le të bëjë punën e vet. Ne kërkojmë që MPB-ja dhe të gjitha institucionet kompetente të veprojnë menjëherë, të zbardhin plotësisht rastin dhe autorët të marrin përgjegjësi, thuhet në komunikatën e partisë.
