Presidenti turk, Rexhep Tajip Erdogan, i cili po kërkon t’i zgjasë dy dekadat e tij në pushtet, ka caktuar zyrtarisht zgjedhjet parlamentare dhe presidenciale të vendit për më 14 maj – një muaj më herët sesa ishte planifikuar, pavarësisht tërmetit shkatërrues të muajit të kaluar.
Zgjedhjet mund të jenë vota më domethënëse e vendit në dekada.
Ato do të përcaktojnë nëse vendi do të marrë një rrugë më demokratike apo do të vazhdojë në kursin gjithnjë e më autoritar të vendosur nga politikani i fortë.
Erdogani ka qeverisur Turqinë që nga viti 2003 – fillimisht si kryeministër dhe si president që nga viti 2014.
Vendi po lufton me një ekonomi të trazuar, inflacion në rritje dhe pasojat e tërmetit të fuqishëm që vrau më shumë se 46 mijë njerëz dhe la qindra mijëra njerëz në 11 provincat turke të strehuar në tenda ose strehim të përkohshëm.
