Kryetari i LSDM-së, Venko Filipçe, sot doli me një propozim për zhbllokimin e rrugës së integrimit evropian të Maqedonisë së Veriut. Rezoluta e tij me vija të kuqe përbëhet nga dy pjesë më të rëndësishme.
“Së pari, Qeveria dhe të gjitha institucionet duhet t’i bashkohen vazhdimisht vendosmërisë për respekt të pakushtëzuar të karakteristikave gjuhësore, historike, identitare dhe kulturore të popullit maqedonas si elementë që nuk negociohen me BE-në. Këto janë vijat tona të kuqe dhe ne besojmë se ato duhet të jenë vija të kuqe të të gjithë kombit.
Së dyti, se Maqedonia është e gatshme të përmbushë detyrimet e Kornizës Negociuese me BE-në, përfshirë ndryshimet kushtetuese, me një vendosmëri të qartë se kjo është pengesa e fundit, pa pranuar kërkesa të reja ose çështje me natyrë identiteti dypalësh.
Të gjitha çështjet dypalëshe me Bullgarinë duhet të zgjidhen në bisedime dhe instrumente dypalëshe, në baza të barabarta pa krijuar bllokime të reja në procesin e negociatave”, tha Filipçe në një konferencë për shtyp në selinë e LSDM-së.
