Shkup, 13 dhjetor – Kur flasim për dezinformimin dhe mënyrën, në të cilën përballemi me to, përgjegjësia nuk është vetëm e Qeverisë apo vetëm e institucioneve, por është përgjegjësi sociale dhe duhet të punojmë të gjithë së bashku dhe të përballemi me të së bashku me dezinformimin si dukuri negative, sepse përgjegjësia është e përbashkët, theksoi zëvendëskryeministrja përgjegjëse për Politika për Qeverisje të Mirë Sllavica Grkovska në konferencën e sotme “Ngritja e perdes: Përballja me dezinformatat politike përmes rritjes së transparencës institucionale”.
Duke iu referuar rrjeteve sociale, ajo tha se të gjithë jemi dëshmitarë që shumë shpesh aty postohen informacione të rreme, shkarkohen dhe shpërndahen pa u kontrolluar më parë.
“Avancimi i transparencës së institucioneve është një nga mjetet për përballjen me dezinformatat, prandaj me qëllim të informimit në kohë, të saktë dhe objektiv të publikut, por edhe me qëllim të rritjes së kontrollit mbi punën e institucioneve, Qeveria nga viti 2017 deri më sot punon intensivisht për përmirësimin e transparencës. Më gëzon fakti që përpjekjet e kësaj qeverie për hapjen e institucioneve po njihen gjithnjë e më shumë”, theksoi Grkovska.
Ajo informoi se kabineti i saj, së bashku me Agjencinë për qasje të lirë në informata publike dhe Qendrën për menaxhimin e ndryshimeve, kanë bërë një analizë të të dhënave më të kërkuara në përputhje me Ligjin për qasje të lirë në informata publike.
Zëvendëskryeministrja tha se kjo masë është vetëm një hap kalimtar për atë që duan të arrijnë në fund, që është hapja e plotë e institucioneve, gjegjësisht vënia në dispozicion e të gjitha të dhënave dhe të gjitha informacioneve, përveç atyre që janë të klasifikuara për shkak të të dhënave personale të qytetarëve.
“Një regjistër i këtillë është i domosdoshëm dhe është thjesht një parakusht që të gjitha institucionet dhe të gjitha të dhënat të digjitalizohen. Në këtë mënyrë rritet transparenca dhe hapja e plotë e institucioneve”, tha Grkovska.
Vesna Shopar, hulumtuese nga Instituti për komunikime, që e organizon konferencën e sotme, duke iu referuar rezultateve preliminare të hulumtimit “Transparenca e institucioneve si parakusht për parandalimin e përhapjes së dezinformatave dhe spekulimeve në Maqedoninë e Veriut”, theksoi se narrativi aktual të institucioneve qeveritare dominohet nga termi i transparencës aktive, që nënkupton shpërndarjen e informacioneve falas dhe të përditësuar rregullisht pa ua kërkuar askush.
Ajo theksoi se matjet, respektivisht indekset e transparencës tregojnë trend të përmirësimit. Shopar shtoi se disa ministri kanë vlerësime shumë të larta të transparencës aktive, por ka edhe nga ato me rezultate të dobëta.
