Një gjykatës federal ka hedhur poshtë akuzat për krim të organizuar dhe shkelje të kontratës kundër reperit Sean “Diddy” Combs, të ngritura nga producenti i tij i mëparshëm, Rodney “Lil Rod” Jones.
Megjithatë, pjesa tjetër e padisë së Jones vazhdon dhe çështja do të trajtohet në një formë të kufizuar, ka raportuar Rolling Stone.
Në vendimin prej 31 faqesh, gjykatësi J. Paul Oetken ka theksuar se Jones nuk arriti të provojë një dëmtim të drejtpërdrejtë në “biznesin apo pronën” e tij që lidhet me veprat penale si krim i organizuar dhe korrupsion. Sipas tij, pretendimi për mospagim për shërbimet e ofruara për albumin “Love” të Combs nuk kishte lidhje të qartë me ndonjë veprimtari të krimit të organizuar.
“Refuzimi i pretenduar i Combs për të respektuar kontratën me Jones nuk përbën vetë një akt të parashikuar nga Ligji kundër krimit të organizuar dhe korrupsionit (RICO), edhe nëse shkelja e kontratës ndodhi për shkak të refuzimit të Jones për të marrë pjesë në skemën e pretenduar të Combs”, ka shkruar gjykatësi.
Gjykatësi ka hedhur poshtë edhe pretendimin e Jones për shkelje të kontratës, duke u mbështetur në ligjin e shtetit të New-Yorkut, i cili kërkon që kontratat që nuk mund të përfundojnë brenda një viti të jenë të shkruara. Gjithashtu, ai hodhi poshtë tri pretendimet për shqetësim emocional, duke i cilësuar ato të pamjaftueshme ligjërisht.
Megjithatë, akuzat për trafikim seksual kundër Combs dhe Kristina Khorram, shefe e stafit të tij, do të vazhdojnë të trajtohen nga gjykata. Gjykatësi ka mbështetur edhe akuzat për sulm seksual dhe përgjegjësi për kushtet e sigurisë ndaj Combs, ndërsa pretendimi për trafikim seksual ndaj kompanisë “Combs Global” u hodh poshtë.
Avokati i Jones, Tyrone Blackburn, e ka cilësuar këtë një fitore.
“Një fitore është një fitore. Çështja është ende gjallë. Combs dhe Khorram duhet të përgatiten për marrjen në pyetje”, ka thënë Blackburn për Rolling Stone.
Nga ana tjetër, Combs ka mohuar çdo akuzë nëpërmjet avokatëve të tij.
“Pavarësisht sa shumë padi ngrihen, kjo nuk ndryshon faktin që z. Combs nuk ka kryer kurrë sulme seksuale apo trafikim seksual ndaj askujt”, kanë thënë avokatët e tij.
Në një deklaratë të mëparshme për Rolling Stone, Kristina Khorram ka mohuar çdo përfshirje të saj.
“Akuzat e rënda që janë bërë kundër meje për muaj me radhë janë të pavërteta dhe po e dëmtojnë reputacionin tim dhe mirëqenien emocionale të familjes sime. Nuk kam mbështetur kurrë dhe nuk kam ndihmuar në asnjë sulm seksual apo drogim të ndokujt”, ka thënë Khorram.
Gjykatësi Oetken ka thënë se padia e Jones ka përmbushur kërkesat për shkelje të ligjeve shtetërore dhe atyre për trafikim seksual, duke përshkruar sesi Combs dyshohet se e ka prekur në mënyrë të papërshtatshme dhe e ka detyruar të kryejë veprime seksuale për kënaqësinë e tij.
“Combs dyshohet se ka rekrutuar apo joshur Jones për të kërkuar dhe kryer akte seksuale me punëtore seksi, si dhe e ka transportuar atë përtej kufijve shtetërorë për këtë qëllim”, ka shkruar gjykatësi.
Nëse shpallet fajtor, Combs, 55 vjeç, mund të përballet me dënim prej 15 vjet deri në burgim të përjetshëm. Gjykimi është planifikuar të fillojë më 5 maj. Çështja ka tërhequr vëmendje të madhe, duke qenë se Combs është paditur nga shumë persona për sjellje të pahijshme seksuale, pas padisë së parë të ngritur nga ish-e dashura e tij, këngëtarja Casandra “Cassie” Ventura, në muajin nëntor të vitit 2023.
