Zëvendëskryeministri Izet Mexhiti ka bërë të ditur sot nga Shkupi se Komuna e Çairit do të hyjë në një fazë të re të zhvillimit urban dhe infrastrukturor, duke lënë pas qasjet e pjesshme dhe zgjidhjet afatshkurtra që kanë karakterizuar menaxhimin e deritanishëm.
Në një deklaratë të fuqishme drejtuar opinionit publik, Mexhiti theksoi se “për më të mirën komunë, i mbledhim ekspertët e botës”, duke paralajmëruar një transformim të thellë dhe të menduar mirë për këtë komunë me rëndësi të veçantë për shqiptarët e Shkupit dhe më gjerë.
“Për Komunën e Çairit nuk do të ketë më zgjidhje gjysmake. Do të ketë vetëm projekte të plota dhe vizionare, që garantojnë zhvillim të qëndrueshëm dhe cilësi jete për banorët. Nuk do të bëjmë ndërhyrje të vogla kozmetike – por transformime të mëdha që do të ndihen për dekada,” tha Mexhiti.
Sipas tij, tashmë ka nisur një bashkëpunim ndërkombëtar me ekspertë të fushës së urbanistikës, dhe një prej figurave më të njohura në këtë fushë ka mbërritur në Shkup për të ndihmuar në hartimin e një plani të ri urbanistik për Çairin.
“Një nga mendjet më të ndritura të urbanistikës ndërkombëtare është tashmë në terren, me hartën e Çairit në duar. Ky nuk është vetëm një sinjal, por një garanci se këtë herë do të veprojmë ndryshe – me përkushtim, dije dhe transparencë,” shtoi ai.
Ky projekt pritet të prekë disa shtylla kyçe të jetës urbane, duke përfshirë:
Modernizimin e infrastrukturës rrugore dhe komunale
Zhvillimin e hapësirave publike funksionale e të aksesueshme
Shtimin e sipërfaqeve të gjelbërta dhe rigjenerimin urban
Zgjidhje të qëndrueshme për trafikun, parkingjet dhe lëvizshmërinë
Krijimin e një identiteti të ri arkitektonik për Çairin, në përputhje me kulturën dhe nevojat e komunitetit
Duke e cilësuar këtë iniciativë si fillimin e një “epoke të re për Çairin”, Mexhiti theksoi se kjo periudhë do të karakterizohet nga angazhimi serioz institucional, përfshirja e profesionistëve dhe pjesëmarrja e qytetarëve në vendimmarrje.
“Më e mira po vjen. Koha e ndryshimit ka nisur… dhe asgjë s’do ta ndalë. Banorët e Çairit meritojnë më shumë, dhe këtë do ta sigurojmë bashkë – me dije, përkushtim dhe vullnet politik,” përfundoi Mexhiti.
Projekti për Çairin pritet të prezantohet zyrtarisht në javët në vijim, ndërsa punimet e para pilot do të nisin brenda këtij viti, me mbështetje teknike dhe financiare nga partnerë vendorë dhe ndërkombëtarë.
