Shkup, 7 qershor– Kryeministri i Bullgarisë, Kirill Petkov në faqen zyrtare të Qeverisë bullgare në Fejsbuk e ka përshëndetur zbulimin e autorit të vënies së zjarrit në qendrën kulturore “Ivan Mihajllov” në Manastir.
Siç njofton korrespondenti i MIA-s nga Sofja, Petkov i ka falënderuar autoritetet në Republikën e Maqedonisë së Veriut dhe kryeministrin Dimitar Kovaçevski për veprimin efektiv, me çka në afat sa më të shpejtë të mundshëm e kanë kapur piromanin.
“Përfundimisht nuk do t’i nënshtrohemi provokimeve që kanë për qëllim t’i sabotojnë raportet me fqinjët tanë, ka shkruar në statusin në Fejsbuk, kryeministri bullgar.
Mediat në Sofje e kanë transmetuar informacionin e ministrit të Punëve të Brendshme të Maqedonisë së Veriut, Oliver Spasovski për autorin e arrestuar të zjarrit në qendrën kulturore “Ivan Mihajllov” në Manastir, i cili ndodhi të shtunën. Mediat e citojnë deklaratën e Spasovskit se autori e ka pranuar plotësisht veprën.
