Shkup, 16 dhjetor – Konferenca “Sfidat ekonomike në vitin 2023: si ta mbajmë rritjen ekonomike dhe ta transformojmë ekonominë” do të mbahet sot në Shkup, në organizimin e Këshillit për avancimin e arsimit të lartë dhe hulumtimeve strategjike në kuadër të Odës Ekonomike të Maqedonisë së Veriut.
Qëllimi i konferencës është t’i bashkojë në një vend krijuesit dhe bartësit e politikave ekonomike dhe përfaqësuesit e komunitetit të biznesit, duke mundësuar dialogun publik-privat dhe prezantimin e pikëpamjeve të ndryshme dhe masave të propozuara për krijimin e politikave ekonomike efektive nga ana e Qeverisë së Republikës së Maqedonisë së Veriut për vitin 2023, thuhet në njoftimin e Odës Ekonomike.
Në konferencë, siç u paralajmërua, fjalim do të ketë kryeministri Dimitar Kovaçevski, ndërsa në kuadër të panel diskutimeve do të marrin pjesë guvernatorja e Bankës Popullore, Anita Angelovska-Bezhoska, ministri i Ekonomisë, Kreshnik Bekteshi, ministri i Financave, Fatmir Besimi, si dhe përfaqësues nga komuniteti i biznesit.
Nga Oda Ekonomike e Maqedonisë së Veriut njoftojnë se konferenca është planifikuar të organizohet tradicionalisht në muajin dhjetor, çdo vit si paralajmërim të politikave ekonomike dhe kushteve të biznesit në vitin e ardhshëm.
