Ish-zëdhënësi i komunës së Tuzit, Kristjan Dukaj, zyrtarisht është në mesin e kandidatëve për çmimin prestigjioz ndërkombëtar për të drejtat e njeriut Human Rights Recognition Awards (HRRA) për vitin 2025, që ndahet nga Geneva Centre for Human Rights Advancement and Global Dialogue (GCHRAGD) në Gjenevë.
“Përveç angazhimit institucional, Dukaj është magjistër i marrëdhënieve ndërkombëtare, i njohur për luftën e tij këmbëngulëse kundër mobingut dhe dhunës në vendin e punës, ku përmes hulumtimeve, paraqitjeve publike dhe angazhimit personal tregon dobësitë sistemike dhe nevojën për forcimin e mbrojtjes ligjore dhe shoqërore të viktimave”, thuhet në njoftim.
Më tej, theksohet se Dukaj është autor i disa librave dhe kolumnave që trajtojnë të drejtat e njeriut, drejtësinë sociale dhe vlerat e solidaritetit shoqëror, duke kontribuar kështu në krijimin e një hapësire më të gjerë për debatin publik mbi tema me rëndësi kyçe për demokracinë dhe barazinë.
“Çmimi HRRA çdo vit vlerëson individë dhe organizata që me veprimtarinë e tyre kontribuojnë në promovimin dhe mbrojtjen e të drejtave të njeriut në nivel global”, përfundon njoftimi.
