Organizata Botërore e Shëndetësisë po konsideron mundësinë për të këshilluar familjet në të gjithë botën për të rishikuar përdorimin e shurupeve të kollës tek fëmijët. Në të njëjtën linjë janë edhe mjekët pediatër në vendin tonë. Ata thonë se çdo lloj shurupi kolle nuk duhet dhënë tek të vegjlit pa rekomandim nga specialisti.
Në fakt, shpesh këto medikamente u jepen fëmijëve nga prindërit si zgjidhje për kollën.
“Çdo lloj shurupi që merret duhet me rekomandim nga mjeku. Sepse mjeku kur e jep shurupin i referohet natyrës së klinikës që ka dhe i jepet produkti që duhet. Prindërit të mos marrin përsipër të mjekojnë vet.”
Në këtë periudhë të ngarkuar me grip dhe viroza të tjera, fëmijët janë ata që po i vuajnë më së shumti pasojat. Sipas mjekëve agresiviteti i sëmundjes ka bërë që të vegjlit të manifestojnë temperaturë të lartë që ka raste që zgjat edhe 10 ditë.
Mjekët pediatër u bëjnë thirrje prindërve të mos neglizhojnë rastet kur fëmija ka kollë dhe temperaturë të lartë, pasi në qarkullim është dhe virusi respirator sinsicial i cili komplikon më së shumti foshnjet.
