Ishte kënaqësi e jashtëzakonshme që për dy ditë me radhë u bëmë bashkë qindra shqiptarë nga diaspora e trojet tona si pjesë e Rrjetit të Bizneseve Shqiptare, shprehet afaristi e filantropi i njohur, Lazim Destani me rastin e 10 vjetorit të themelimit, Rrjeti Global i Bizneseve të Diasporës që i ka bërë bashkë afaristët shqiptarë në Prishtinë.
Bizneset shqiptare nga diaspora e organizuan dhe e mbajtën forumin dy ditorë /17-18/ për të ndarë eksperiencat e tyre si dhe për të krijuar një urë lidhëse për bashkëpunime.
Përshtypjet nga ky forum, Destani i shënoi edhe në faqet e tij sociale.
Postimi i plotë
Ishte kënaqësi e jashtëzakonshme që për dy ditë me radhë u bëmë bashkë qindra shqiptarë nga diaspora e trojet tona si pjesë e Rrjetit të Bizneseve Shqiptare. Për dy ditë rresht qëndruam në Prishtinë, në vitin jubilar të 10-vjetorit të këtij Rrjeti. Ishin dy ditë të ngjeshura me aktivitete, takime e diskutime me anëtarë e përfaqësues të degëve që veprojnë në shtete të ndryshme europiane. Gjatë këtyre aktiviteteve gjithashtu realizuam vizita në disa kompani në Prishtinë e në qytete tjera të Kosovës ku ndoqëm prezantime dhe ku u zhvilluan shumë takime B2B mes përfaqësuesve të bizneseve të diasporës e të vendit.
Ky aktivitet i ka shërbyer diasporës dhe Rrjetit Global të Bizneseve Shqiptare për të ecur në rrugën e duhur, drejt rritjes së bashkëpunimit mes anëtarëve e bizneseve shqiptare. Sa më shumë t’i forcojmë lidhjet dhe bashkëpunimin tonë aq më të suksesshëm do të jemi në projektet që kemi para nesh e në misionin tonë.
Uroj dhe shpresoj, për të mirën e të gjithë shqiptarisë ky Rrjet të ecë në rrugën e duhur të zhvillimit e fuqizimit të tij, duke mbledhur rreth vetes sa më shumë afaristë shqiptarë, kudo që ata ndodhen me aktivitetet e tyre.
