Rezultatet e raundit të parë treguan qartë vullnetin e qytetarëve, ndërsa unë kam fituar më shumë vota se të gjithë kundërkandidatët e mi që vijnë nga, siç themi kushtimisht, blloku politik maqedonas – tha kandidati për kryetar të Komunës së Kumanovës, Maksim Dimitrievski.
– Jam mirënjohës për mbështetjen nga partnerët në qeveri, VMRO-DPMNE dhe Vredi, por edhe më shumë jam mirënjohës për mbështetjen e qytetarëve, me të cilët u dëshmua qartë dëshira që Kumanova të vazhdojë në rrugën e përcaktuar – tha Dimitrievski në debatin në Telma.
Ai theksoi se ka dërguar një automjet dhe mbështetje logjistike për pastrimin e mbeturinave në Komunën Qendër si përgjigje ndaj thirrjes së ZELS-it dhe dëshirës për t’u ndihmuar qytetarëve të Shkupit.
– Unë thjesht iu përgjigja pozitivisht thirrjes së ZELS-it për të ofruar ndihmë aty ku është më urgjente, ndërsa Shkupi po përballet edhe me një mundësi shpërthimi epidemie për shkak të grumbujve të mbeturinave. Nëse kujtoheni, ashtu ka qenë edhe në të kaluarën, kur të parët kemi ardhur në ndihmë gjatë zjarrit në Gazi Babë. Edhe kjo aksion aktuale është harmonizuar në nivel qeveritar – tha Dimitrievski.
Ai shtoi se qytetarët e Kumanovës e dinë që ai është njeri fjale dhe se gjithçka që ka premtuar në program, do ta përmbushë.
Si projekte kapitale prioritare ai përmendi ndërtimin e tre çerdheve për fëmijë, tre rrethrrotullimeve dhe rregullimin e plotë të pjesës qendrore të Kumanovës. Ai njoftoi gjithashtu se do ta modernizojë dhe përmirësojë transportin publik, i cili është falas dhe përdoret çdo ditë nga rreth 15.000 qytetarë.
Dimitrievski njoftoi se vetëqeverisja lokale do ta marrë dhe rregullojë objektin e ish-Shtëpisë së Pionerëve, sipas shembullit të sallës sportive dhe sallës “Sokolana”.
Në serinë e replikave që pati me kundërkandidatin e tij Goran Stojkovski Diro, Dimitrievski e quajti atë kandidat të “një elite të konsumuar politike e ndërtimore”, e cila përmes tij dëshiron të vazhdojë me bizneset e veta, por ai, si kryetar komune, u ka dalë përpara dhe nuk ka lejuar që të vazhdojnë me shkatërrimin e qytetit.
Dimitrievski i ftoi qytetarët të dalin masivisht më 2 nëntor dhe ta rrethojnë numrin 2 në zgjedhjet lokale në Kumanovë.
– Ju ftoj të votoni për vazhdimësi, të votoni për diçka konkrete, e jo për fjalë boshe. Unë e vlerësoj fjalën tuaj – vlerësoni edhe ju veprat që kemi arritur t’i realizojmë gjatë këtyre 8 viteve. Një gjë mund ta premtoj – gjithçka që kam shkruar në programin tim, të cilin u mundova ta shpërndaj pothuajse në çdo shtëpi, premtoj se do ta përmbush plotësisht, së bashku me ekipin tim – premtoi kandidati i ZNAM për kryetar të Kumanovës, Maksim Dimitrievski.