Hristijan Mickoski, duke iu përgjigjur sot pyetjeve të gazetarëve lidhur me ditën e fundit të fushatës zgjedhore në Bërvenicë dhe pritshmëritë për raundin e dytë të zgjedhjeve, deklaroi:
„Po, sot, në fund të ditës, do të mbajmë fjalimin përmbyllës para banorëve të Bërvenicës. VMRO-DPMNE në çdo fushatë hyn me synimin për të fituar, ashtu siç kemi hyrë edhe në këtë fushatë në Bërvenicë, në raundin e dytë. Në raundin e parë morëm më së shumti vota, pothuajse 3.000, ndërsa tani presim që ta rrisim edhe më tej këtë numër. Synimi ynë është të kalojmë mbi 4.000 vota dhe vlerësojmë se kjo do të na sigurojë fitoren në Bërvenicë.
VMRO-DPMNE, së bashku me koalicionin, gjithmonë hyn në zgjedhje për të fituar. Ne, ndryshe nga partitë politike që u bashkuan rreth kandidatit kundërshtar, iu drejtuam banorëve të Bërvenicës. Ata krijuan ndasi etnike, pa marrë parasysh se pas datës 2 do të largohen, ndërsa njerëzit do të mbeten këtu për të jetuar së bashku, maqedonasit, shqiptarët dhe të tjerët, të krishterët dhe myslimanët.
Fatkeqësisht, zhvilluan një fushatë të tillë, do të thosha, që nuk i ka hije shekullit XXI, por kjo është ajo që është. Ata vlerësojnë se, me sa duket, në këtë mënyrë do të fitojnë edhe një kryetar komune në Bërvenicë.
Mesazhi im për banorët e Bërvenicës dhe për opinionin maqedonas është se, kur vendosin se kujt do t’ia japin votën, duhet të mendojnë nëse do t’ua japin atyre që në të kaluarën patën mundësi për më shumë se dy dekada të bëjnë diçka, por nuk bënë asgjë, duke lënë pas vetes zero rezultate, apo atyre që sot po realizojnë gjithçka që, për fat të keq, nuk ishte bërë në të kaluarën.
Këtu nuk ka ndarje etnike. Prandaj, dëshiroj t’u përcjell edhe një herë mesazh banorëve të Bërvenicës dhe qytetarëve të Maqedonisë se, nëse duam të ecim përpara, duhet të flasim për më shumë projekte dhe për vlerë të shtuar në cilësinë e jetës së qytetarëve, e jo të kthehemi te politikat e shekullit të kaluar.
Ato janë gomë shpëtimi për politikanët që i përkasin shekullit të kaluar dhe kështu e shohin edhe këtë fushatë në Bërvenicë. Por, në fund të fundit, të dielën do ta shohim se cili do të jetë rezultati.
Pres që dita të kalojë e qetë, pa incidente të mëdha, në mënyrë që të tregojmë se jemi një demokraci e pjekur, gjë që në fakt po e dëshmojmë. Paqja te ne nuk është vënë në pikëpyetje, ndërkohë që në rajon, në vendet fqinje, por edhe në mbarë Evropën, shohim se në disa qytete situata është mjaft e tensionuar.“
