Shkup, 23 dhjetor – Kryeministri Dimitar Kovaçevski së bashku me zëvendëskryeministrin për Çështje Ekonomike dhe Koordinim të Politikave Ekonomike, Fatmir Bytyqi vizituan kompaninë EjxhTekGrup (HTEC), ku do të hapen 300 vende të reja pune në vend. Kompania nënshkroi një marrëveshje me Qeverinë në bazë të Ligjit për kontrollin e ndihmës shtetërore për një projekt investimi pesëvjeçar që fillon në qershor të vitit 2021, me një vlerë prej 4.5 milionë euro.
“Qeveria në këto kohëra krize dhe të paparashikueshme ka qëndruar pas punëtorëve, punëdhënësve dhe sektorit të biznesit. Mbështetja e kompanive në kohë të mbushura me sfida është e një rëndësie kyçe, sepse në këtë mënyrë u mundësojmë kompanive të hyjnë në procese investuese dhe e gjithë kjo çon në rritjen e përshpejtuar ekonomike të vendit, rritjen e PBB-së, si dhe etablimin e Maqedonisë së Veriut në tregjet globale në Evropë dhe në botë. Qytetarët këtu kanë kapacitet, kanë aftësi dhe njohuri dhe më vjen mirë që ekipi menaxhues i EjxhTek e ka njohur këtë, që pikërisht këtu në vendin tonë të krijojnë një qendër të re zhvillimi dhe kërkimi në të cilën planifikohet të punësohen inxhinierë dhe dizajnerë për zhvillimin e softuerit të ri me teknologji të lartë, digjitalizim dhe krijim i produkteve të teknologjisë së lartë. Ne si Qeveri ofrojmë mundësi dhe përparësi për të investuar në Maqedoninë e Veriut, ofrojmë stabilitet për investime në vend, por kushti ynë kryesor janë punë të qëndrueshme dhe të paguara mirë për qytetarët tanë. Qeveria krijon një zonë për investime të sigurta, synimi ynë është të krijojmë kushte në nivel global të nevojshëm për funksionimin normal të kompanive, pavarësisht nëse janë investitorë të huaj apo vendas. Me hapjen e vendeve të tilla të punës, ne u ofrojmë të rinjve perspektivën që të vazhdojnë të punojnë dhe të investojnë me punë dhe njohuri në vendin e tyre dhe në të njëjtën kohë të paguhen në mënyrë evropiane”, tha Kovaçevski.
Zëvendëskryeministri Bytyqi theksoi rëndësinë e mbështetjes së kompanive për të krijuar vende të reja pune të paguara mirë.
“Falënderoj EjxhTekGrup për mikpritjen sot dhe i uroj sukses dhe siguri se do të vazhdojmë të punojmë në partneritet drejt zhvillimit, kabineti im është i përkushtuar ndaj zhvillimit të klimës së biznesit dhe kushteve të investimit për kompanitë”, theksoi Bytyqi.
Tashmë kanë filluar pagesat për ndihmën shtetërore për kompanitë sipas Ligjit për mbështetjen financiare të investimeve. Këtë vit mbështesim rekord 417 kompani dhe çdo vit që rrisim buxhetin për mbështetje, këtë vit do të paguhen 1,7 miliardë denarë. Me ardhjen time në këtë pozicion në vitin 2020, për herë të parë pavarësisht krizës së Kovid-it, ne patëm pagesën 100% të ndihmës shtetërore dhe vazhdojmë këtë vit ashtu si vitin e kaluar, gjë që konfirmon përkushtimin tonë ndaj tyre dhe synimin tonë për të vazhduar mbështetjen “, tha Bytyqi.
Mirosllav Virajeviq theksoi se HTEC Group vazhdon me plane ambicioze për investime në rajonin e Evropës Juglindore.
“Ne jemi krenarë për qendrën tonë të zhvillimit në Shkup dhe njerëzit tanë – punën e tyre të shkëlqyer, njohuritë dhe dëshirën për të zgjidhur sfidat komplekse inxhinierike të kompanive më të guximshme në planet.” Sektori i TI-së në Maqedoninë e Veriut është një ekosistem që po rritet vazhdimisht dhe HTEC Group është e përkushtuar të kontribuojë më tej në rritjen dhe zhvillimin e tij. Ekipi ynë në Shkup përbëhet nga më shumë se 130 ekspertë dhe sipas Marrëveshjes për ndihmë shtetërore me Qeverinë e Republikës së Maqedonisë së Veriut, të paktën 170 persona shtesë do të punësohen në pesë vitet e ardhshme. Në pesë vitet e ardhshme, ne do të investojmë një shumë totale prej të paktën 4,500,000 milionë euro në Maqedoninë e Veriut. Duam t’a falënderojmë Qeverinë për mbështetjen e saj në tejkalimin e kufijve të teknologjisë dhe për të mbetur platforma më e mirë për zhvillim profesional dhe personal për punonjësit tanë. HTEC Group do të vazhdojë ndikimin e tij të rëndësishëm në ekonominë e vendit ku operon nëpërmjet krijimit të vendeve të punës, inovacionit dhe eksporteve të shërbimeve. Edhe një herë ju falënderoj për besimin dhe partneritetin tuaj”, tha Virajeviq.
