Një djalë tetë vjeçar është goditur nga rrufeja në qytetin bullgar Burgas teksa ishte në plazh me prindërit dhe motrën. Rrugës për në restorant, ata u goditën nga një stuhi e fortë kur vendosën të kërkonin strehim.
“Kur u godit nga rrufeja, nëna e tij thirri 911. Unë vrapova të kontrolloja nëse djali ishte i vetëdijshëm. Nëna i bëri frymëmarrje artificiale dhe babai i masazhoi zemrën”, tha Nikolla, një kalimtar i rastësishëm që ndodhi në plazh gjatë stuhisë. Djali u dërgua në spital nga babai i tij, ku u konstatua se kishte përjetuar vdekjen klinike.
“Ai nuk kishte shenja vitale dhe asnjë aktivitet të zemrës”. “Falë reagimit të shpejtë të mjekëve të urgjencës, të cilët menjëherë i dhanë ilaçe dhe e intubuan, zemra e djalit filloi përsëri të rrahë”, tha zëvendësdrejtori i spitalit, Svetoslav Todorov.
Ai është vendosur në reanimacion dhe është në rrezik për jetën.
“24 orët e para janë kritike. Atij iu dhanë teste të reja. Ai ka marrë djegie në gjoks dhe gjymtyrë”, shtoi Todorov.
Mjeku që pranoi dhe intuboi djalin tha se aparati tregoi se djali kishte infarkt miokardi, por analizat do të konfirmonin nëse ishte vërtet kështu.
Djali është në koma të induktuar dhe nuk ka dëmtime në tru. Shërimi i djalit pritet të jetë i gjatë dhe i vështirë, shkruajnë mediat e rajonit.
