Këto ditë ka dalë nga shtypi monografia “Shkëlqimi i yllit”, kushtuar jetës dhe karrierës sportive të legjendës së mundjes ndër ne, Shaban Sejdiut. Autor i monografisë është gazetari i ndjerë Mirosllav Naumovski, ndërsa përkthimin në shqip e ka bërë Agron Ismaili, lekturimin Shkelzen Halimi.
Shaban Sejdiu, njëri nga legjendat e gjallë të Olimpizmit Botëror dhe njëri nga më të mëdhenjtë në sportin e mundjes në nivel Botëror, pjesëmarrës në katër Lojëra Olimpike, ishte për vizitë dje te kryetari i Komunën së Çairit, Visar Ganiu, për t’ia dhuruar një kopje të monografisë që është botim i Komitetit Olimpik dhe siç merret vesh, promovimi do të bëhet më 23 dhjetor.
“Ndihem tejet i nderuar që jam njeriu i parë të cilit kampioni ia dhuron monografinë e tij “SHKËLQIMI I YLLIT” që do ta promovojë më datë 23.12.2022. Bashkë me Sejdiun, në takim kishim edhe njërin nga redaktorët e kësaj monografie të Botuar nga Komiteti Olimpik I Maqedonisë, Zoran Mihajllov”, ka shkruar Visar Ganiu në Facebook.
“Suksesi sportiv i Shaban Sejdiut, që nisi në Shkollën Fillore “Liria” dhe e vazhdoi në një rrugë tejet të veçantë me përplot medalje e trofe në nivel kombëtar e botëror, na bën të ndjehemi gjithmonë krenarë dhe shembull për të gjithë. Uroj kampionin për këtë monografi me të cilën padyshim lenë gjurmë të pashlyeshme tek e ardhmja jonë e suksesshme sportive”, ka komentuar kryetari i Çairit.
