Objekti i Komunës së Tearcës sot mbeti pa rrymë elektrike për shkak të faturave të papaguara ndaj EVN-së. Megjithatë, siç informuan nga komuna dhe EVN-ja për Portalb.mk, faturat janë paguar dhe do të bëhet përsëri lidhja.
Komunës së Tearcës sot iu ndërpre rryma për shkak të faturave të papaguara, edhe pse kryetari i komunës Nuhi Neziri për Portalb.mk thotë se nuk kanë borxhe.
“Janë çështje teknike, nuk kemi borxhe me EVN-në, jemi krejt në rregull”, tha Neziri.
Por një gjë të tillë e mohuan nga EVN-ja.
“Komuna e Tearcës është shkyçur si rezultat i faturave të papaguara ndaj elektrodistribuimit”, thanë nga EVN.
Megjithatë kryetari i komunës thotë se “elektrodistributori është bërë faktor ngaqë nuk ka kontaktuar me ne”.
Neziri tha se kjo çështje është zgjidhur dhe presin konfirmim.
Edhe nga EVN-ja për Portalb.mk e konfirmuan se komuna ka paguar dhe se do të bëjnë lidhjen përsëri.
Për këtë problem kritikuan eksponentë të koalicionit VLEN.
