Struga ka nisur sezonin e ri futbollistik me një fitore të merituar ndaj FK Makedonija Gj.P, dhe ky sukses nuk ka kaluar pa jehonë nga figura të njohura të qytetit. Kandidati i pavarur për kryetar të Komunës së Strugës, Mendi Qyra, ka reaguar me emocione të forta pas fitores, duke përgëzuar klubin dhe tifozët për përkushtimin e jashtëzakonshëm.
Në një postim të shpërndarë në rrjetet sociale, Qyra thekson se FC Struga Trim & Lum është më shumë se një klub futbolli – është një ëndërr e bërë realitet përmes punës, përkushtimit dhe pasionit për qytetin dhe sportin. Ai rikujton rrugëtimin e klubit nga ditët e para, kur qyteti kishte nevojë për një ekip serioz, deri në sukseset e sotme në Ligën e Parë të Maqedonisë së Veriut dhe arenën evropiane.
“Që nga dita e parë kam besuar në potencialin sportiv të Strugës dhe në zemrën e madhe të tifozëve tanë. Jam i lumtur që e hapëm sezonin me një fitore – kjo është vetëm fillimi i një kapitulli të ri”, u shpreh Qyra.
Ai falënderoi tifozët për energjinë që japin dhe futbollistët për përkushtimin në fushë, duke theksuar se Struga jo vetëm që mund të jetë e para në fushën e sportit, por edhe në çdo drejtim tjetër.
Ky reagim vjen në një kohë kur Mendi Qyra ka shpallur kandidaturën e tij për komunën e Strugës si i pavarur, duke premtuar një qasje të re për zhvillimin e qytetit dhe përforcimin e vlerave lokale – përfshirë edhe mbështetjen për sportin dhe rininë.
“Struganët mund të jenë të parët – në fushë, por edhe në jetë”, përfundon ai, duke dhënë sinjalin e një angazhimi të qartë për një Strugë më dinamike, më krenare dhe më të bashkuar.
