Shkup, 27 dhjetor – Ministria e Punëve të Brendshme informoi se janë bërë të gjitha verifikimet e nevojshme lidhur me denoncimet e sotme prej 20 shkollave në Shkup pas mesazheve të marra në adresat elektronike me kërcënimin për mjet të vendosur shpërthyes dhe është përcaktuar se bëhet fjalë për denoncime të rrejshme.
“Menjëherë pas denoncimeve të marra, nga nëpunësit policorë janë ndërmarrë masa për evakuimin e sigurt të objekteve, ndërsa më pas janë kryer edhe kontrolle të detajuara nga ekipet e kontrolleve antiterroriste dhe është përcaktuar se bëhet fjalë për alarme të rrejshme”, kumtuan nga MPB.
