Kryetari aktual i Komunës së Tetovës dhe kandidati për një mandat të dytë, Bilall Kasami, ka marrë përkrahje të fuqishme nga banorët e lagjeve Teqe dhe Bregu i Diellit, dy prej zonave më simbolike të qytetit. Në një tubim entuziast, Kasami tha se kjo mbështetje është dëshmi e qartë se Tetova është në rrugë të mbarë dhe qytetarët duan vazhdimësi.
“Teqen e bëmë me rrugë evropiane, ndërsa në Bregun e Diellit e zgjidhëm problemin shumëvjeçar me ujin e pijshëm” deklaroi Kasami, duke theksuar se këto janë vetëm disa nga rezultatet konkrete të mandatit të tij të parë.
Ai shtoi se këto dy lagje, ashtu si mbarë Tetova, po transformohen dita-ditës, dhe se në mandatin e ardhshëm do të punohet “edhe më mirë, edhe më shumë, edhe më fuqishëm” për të vazhduar zhvillimin e qytetit.
“Kjo prezencë dhe përkrahje nga zemra e Tetovës na mbush zemrat plot entuziazëm për fitoren e madhe të 19 tetorit”, u shpreh Kasami para mbështetësve.
