Trajneri i Liverpoolit: Sytë e gjithë botës do të jenë te ne

Trajneri i Liverpoolit, Andoni Iraola, ka kërkuar angazhim maksimal nga futbollistët e tij para derbit të madh kundër Manchester Unitedit në “Anfield”, ku synon t’ia prishë debutimin trajnerit të ri të rivalëve, Mauricio Pochettino.

Përballja mes dy gjigantëve anglezë këtë herë merr edhe më shumë vëmendje, pasi Pochettino pritet ta drejtojë Manchester Unitedin për herë të parë.

Rivaliteti historik rikthehet në “Anfield”

Iraola është plotësisht i vetëdijshëm për rëndësinë e kësaj ndeshjeje dhe kërkon nga skuadra e tij një rezultat që pasqyron peshën e këtij rivaliteti.

Iraiola ka theksuar se përballjet mes Liverpoolit dhe Manchester Unitedit janë të veçanta dhe se forma aktuale e skuadrave shpeshherë nuk luan rol vendimtar në këto takime.

“Gjëja e parë që duhet të them është se është kënaqësi të jemi sërish këtu, veçanërisht për një ndeshje kaq të madhe si kjo e sotmja. E di se kjo është një përballje që tifozët e të dy klubeve e presin me padurim dhe nuk është ndryshe as për ne që jemi të përfshirë si futbollistë apo trajnerë.

Liverpooli kundër Manchester Unitedit gjithmonë krijon një ndjenjë të veçantë pritjeje, pavarësisht se kur dhe ku zhvillohet ndeshja dhe kush është pjesë e saj”, ka deklaruar Iraola.

Ai më pas ka theksuar se futbollistët duhet ta kuptojnë përgjegjësinë që bart një përballje e tillë.

“Për ne është privilegj, por njëkohësisht edhe përgjegjësi e madhe, për shkak të asaj që përfaqëson ky rivalitet. Sytë e gjithë botës do të jenë te ne dhe këtë duhet ta shfrytëzojmë si motivim.

Duam dhe pothuajse me siguri do të na duhet të jemi në nivelin tonë më të lartë. Ky është standardi që kërkon kjo ndeshje”, ka shtuar trajneri i Liverpoolit.

Iraola kërkon përqendrim maksimal gjatë gjithë ndeshjes

Iraola kërkon një paraqitje të plotë nga skuadra e tij, me angazhim maksimal të secilit futbollist që nga minuta e parë.

Ai ka përmendur edhe ndeshjet e mëparshme ndaj Manchester Cityt dhe Arsenalit, ku Liverpooli, sipas tij, nuk kishte arritur të shfrytëzonte deri në fund rastet për të marrë pikët e plota në shtëpi.

Për derbin ndaj Manchester Unitedit, trajneri spanjoll kërkon përqendrim të plotë, pasi çdo gabim mund t’i kushtojë shtrenjtë skuadrës.

“Kjo do të thotë të jemi plotësisht të përfshirë që nga fillimi dhe në çdo moment të ndeshjes. Gjithashtu, duhet ta shfrytëzojmë maksimalisht çdo situatë.

Nëse arrijmë ta bëjmë këtë, nuk kam dyshime se do t’i rrisim gjasat për të marrë rezultatin që e dëshirojmë ne dhe tifozët tanë.

Përgjegjësia është gjithmonë e jona. Shpresoj që, brenda dhe jashtë fushës, të tregojmë fytyrën më të mirë të Liverpoolit, duke qëndruar të bashkuar nga vërshëllima e parë deri te ajo e fundit”, ka deklaruar Iraola.

Ai pret një Manchester United të motivuar, i cili do të dëshirojë të japë një sinjal të fortë nën drejtimin e trajnerit të ri, Mauricio Pochettino.

“Ne nuk mund të shpërqendrohemi nga ajo që njerëzit mendojnë se tregon renditja në këtë moment. Kjo është një ditë kur këto gjëra nuk kanë të njëjtën rëndësi si në rrethana të tjera.

Historia e rivalitetit mes dy klubeve tona na e tregon këtë. Duhet të presim dhe të përgatitemi për versionin më të mirë të Manchester Unitedit, sepse ata me siguri do ta shohin këtë ndeshje si një mundësi për të treguar vlerat e tyre, veçanërisht nën drejtimin e trajnerit të ri”, ka paralajmëruar Iraola.

Liverpooli synon të përmirësojë rezultatet në shtëpi

Një tjetër shqetësim për trajnerin spanjoll mbetet forma e Liverpoolit në “Anfield”.

Edhe pse skuadra ka treguar rezultate shumë të mira në udhëtim, përfshirë fitoren e fundit 3:1 ndaj Crystal Palace, Iraola kërkon që i njëjti nivel të shfaqet edhe në ndeshjet në shtëpi.

Ai ka vlerësuar mbështetjen e tifozëve, por kërkon që futbollistët t’ua shpërblejnë besimin me paraqitje dhe rezultate më të mira.

“Është shumë e rëndësishme, sepse në këtë kampionat është jashtëzakonisht e vështirë të fitosh në udhëtim. Por pikërisht për këtë arsye është edhe më e rëndësishme që ta ngremë nivelin e paraqitjeve tona në shtëpi.

Në disa raste, detajet e vogla kanë bërë dallimin në rezultatet e ndeshjeve tona në ‘Anfield’. Nuk po e them këtë për të gjetur justifikime, por për të theksuar se duhet të bëjmë më shumë, në mënyrë që këto detaje t’i kthejmë në favorin tonë ose t’i eliminojmë plotësisht”, ka përfunduar Iraola.

Burimi: botasot.info