Shkup, 19 dhjetor – Në Fakultetin Filozofik në Shkup, sot me fillim në ora 12:00, do të mbahet tryezë e rrumbullakët “Mësimi social dhe emocional në fëmijërinë e hershme”. Në këtë ngjarje do të marrin pjesë ministrat e Punës dhe Politikës Sociale dhe të Arsimit dhe Shkencës, Jovanka Trençevska dhe Jeton Shaqiri, ndërsa para të pranishmëve do t’i drejtohet përfaqësuesja e UNICEF-it në Republikën e Maqedonisë së Veriut, Patricia di Xhovani.
Tryeza e rrumbullakët është aktiviteti final i projektit “Mësimi social dhe emocional në fëmijërinë e hershme”, i mbështetur nga Zyra e UNICEF-it, në kuadër të të cilit nga 30 maji deri më 3 qershor të këtij viti, në Fakultetin Filozofik në Shkup u mbajt Shkolla verore.
Në këtë ngjarje do të nënshkruhet një Angazhim për forcimin e njohurive dhe kompetencave në fushën e të mësuarit dhe zhvillimit social dhe emocional në fëmijërinë e hershme midis edukatorëve, mësuesve të klasës dhe bashkëpunëtorëve profesional përmes modelit të të mësuarit gjatë gjithë ciklit jetësor.
Angazhimi do të nënshkruhet nga ministrat e punës dhe politikës sociale dhe të arsimit dhe shkencës, drejtori i Byrosë për zhvillim të arsimit dhe dekani i Fakultetit Filozofik në Shkup.
