VMRO-DPMNE i jep afat Kovaçevskit deri më 10 maj për takim tet-a-tet

Shkup, 29 prill – VMRO-DPMNE sot përmes një komunikate për media, i ka kthyer përgjigje refuzimit të Kovaçevskit për një takim ballë për ballë me Mickoskin. Nga DPMNE shprehen se nëse Kovaçevski nuk është i gatshëm për takim, atëherë këtë mund ta bëjë dikush tjetër nga LSDM, qoftë Zaevi apo Shekerinska, informon Zhurnal.

VMRO-DPMNE madje i jep afat prej 12 ditëve, gjegjësisht deri më 10 maj që të sqarohet për ofertën, e ndërkohë mundet edhe t’i konsultojë organet e partisë ose mentorët e tij në LSDM.

“LSDM dhe Kovaçevski sillen si të papjekur dhe pa përgjegjësi. Ata pa menduar e refuzojnë dorën e shtrirë të VMRO-DPMNE-së për ndihmë në menaxhimin me krizën dhe problemet me të cilat përballet Maqedonia, e pikërisht përshkak qeverisjes së tyre. Themi se sjellja e tyre është infantile, sepse refuzuan takim ku do të bisedoheshte për formimin e katër ekipeve në pjesën e ekonomisë, poitikës së jashtme, shëndetësisë dhe arsimit dhe do të punojnë pa privilegje, vetëm e vetëm që t’i ndihmojnë Qeverinë dhe qytetarët, për të dalë nga problemet akute në shoqëri dhe tensioni në të cilën jetojnë. LSDM ikë nga tema e zgjedhjeve të parakohshme, sepse e dinë se do të humbnin. Ata janë të gatshëm të shkatërrojnë shtetin vetëm e vetëm për të mbrojtur karrigen”, thuhet në reagimin e VMRO-DPMNE-së.

Nga kjo parti shtojnë se oferta e tyre është për të mirën e Maqedonisë e kryeministri Kovaçevski nuk ka luksin të zgjedhë çfarë i pëlqen e çfarë jo.

“Oferta është e qartë, të definohet termin për zgjedhje të reja, e ndërkohë këto ekipe prej ekspertësh, pa privilegje t’i ndihmojnë Qeverisë, pa partizim, pa politizim, që të mund të zgjidhen problemet akute. LSDM dhe Kovaçevski duhet të tregojnë se u intereson e ardhmja e qytetarëve, e jo vetëm pushteti i shkretë”, thonë nga VMRO-DPMNE./Zhurnal.mk

Të fundit në përqindje