Sot zëvendësministri i Transportit dhe Lidhjeve Bekim Rexhepi pati një takim pune me kryetarin e Komunës së Bogovinës, Besnik Emshiu.
Në takim u diskutua për projektet infrastrukturore të realizuara nga komuna me mbështetjen e pushtetit qendror.
Në vazhdim keni deklaratën e plotë të zëvendësministrit Bekim Rexhepi:
Sot jemi në komunën e Bogovinës për të përcjellë një lajm të mirë për banorët e vendbanimit Pallçisht i poshtëm. I njoftova banorët dhe kryetarin e komunës se projekti për rikonstruksionin e ujësjellësit në vendbanimin Pallçisht i poshtëm është aprovuar nga Banka Evropiane për Investime dhe të njejtin do ta realizojmë në bashkëpunim me komunën.
Vlera e projektit është 16,4 milionë denarë, ndërsa do të rikonstruktohet ujësjellësi i vjetër në gjatësi prej 3,5 km. Muajin e ardhshëm pres që të shpallet tenderi për rikonstruksion dhe me përzgjedhjen e kontraktorit të fillojmë menjëherë me punimet e ndërtimit në terren.
Besoj se me këtë projekt do të përmirësojmë kapacitetin e ujësjellësit në këtë vendbanim dhe kështu do të përmirësojmë kushtet e jetesës së banorëve. Një gjë tjetër që dua të theksoj është se përmes Ministrisë së Transportit dhe Lidhjeve, komunës së Bogovinës i janë ndarë 721 mijë euro për ndërtimin dhe rindërtimin e rrugëve lokale.
Në këtë moment po përgatitet dokumentacioni për 3 projekte, ku përfshihen:
– Rindërtimi i rrugës në vendbanimin Palçishtë
– Rikonstruksioni i rrugës lokale Pirok – Gradec
– Rindërtimi i rrugës lokale Bogovinë – Sedlarcë.
Me kryetarin e komunës z. Besnik Emshiu, dëshmojmë se bashkëpunimi mes pushtetit qendror dhe atij lokal është jashtëzakonisht i rëndësishëm, sidomos kur bëhet fjalë për përmirësimin e kushteve të jetesës së të gjithë qytetarëve.
