“Të 132 personat e ndodhur në bordin e avionit MU 5735 konfirmohen zyrtarisht të vdekur”, ka deklaruar një zyrtar i lartë rajonal i ngarkuar me grupin e punës për gjetjen e trupave dhe avionit të rënë në rajonin autonom Guangxi. Sipas tij, “në aksidentin tragjik nuk ka mbetur asnjë i gjallë nga 123 pasagjerët dhe 9 pjestarët e ekujpazhit”.
Deklarata është bërë 6 ditë pas kërkimeve me detaje në zonën ku ndodhi edhe rrëzimi i avionit duke kontrolluar me imtësi gjithçka me radar dhe shërbime të tjera. Deri tani janë gjetur mbi 120 kampione personash të cilët do të identifikohen nëpërmjet procesit të kontrollit të ADNsë.
“Analizat laboratorike të kryera nga 41 kampione të marra në vendin e ngjarjes, kanë treguar se nuk ka gjurmë të ndonjë shpërthimi të mundshëm që në ajër”, ka nënvizuar zyrtari i kontrollit rajonal. Bëhet e ditur se është gjetur edhe kutia e dytë e zezë “edhe ajo mjaft e dëmtuar”.
Kërkuesit kanë gjetur edhe transmetuesin lokal të emergjencës që ndodhej në aeroplan, i cili është instaluar ngjitur me kutinë e dytë të zezë.
Aeroplani Boeing 737-800, u nis nga Kunming të provincës Yunnan në drejtim të Guangzhou në provincën Guangdong. Avioni u rrëzua pasditen e së hënës në një zonë të thellë malore në rajonin autonom Guangxi.
