Saranda është një destinacion që ka vizitushmëri gjatë 365 ditëve. Sipas drejtoreshës së Turizmit dhe Aktiviteteve në Bashkinë e Sarandës, Eva Mato, sezoni turistik për këtë vit ka nisur më herët dhe po punohet fort për promovimin e vlerave të Sarandës brenda dhe jashtë Shqipërisë.
Interes të shtuar ka patur për Sarandën sidomos nga qytetaret e vendeve nordike. Ndërsa linjat e krocerave kanë shtuar turistët amerikanë në Sarandë.
Përveç detit dhe diellit, Saranda në paketat e saj ofron edhe vizita në vendet arkeologjike dhe historike.
Vitet e fundit turizmi ka lulëzuar në Sarandë, ku përveç komoditetit që të ofron ky vend ka mundësi mjaft të mira akomodimi dhe shumë restorante, qofshin tradicional apo të ndërthurur me modernen.
