GazetaMax
LAJME

Besimi – Yu: Vijon partneriteti i ndërsjellë me Bankën Botërore përmes Kornizës së re, ku prioritet është arritja e rritjes inkluzive, të qëndrueshme dhe të gjelbër

 Sot, ministri i Financave, Fatmir Besimi zhvilloi takim pune me drejtoreshën rajonale të BB-së për Ballkanin Perëndimor, Xiaoqing Yu dhe drejtorin e BB-së në vend, Massimiliano Paolucci. Në këtë takim u diskutua mbi Kornizën e re të partneritetit me RMV-në për periudhën 2024-2028.
 
“Bashkëpunimi me Bankën Botërore është në bazë të partneritetit të ndërsjellë dhe strategjive shumëvjeçare të bashkëpunimit. Jemi në fazën e hartimit të Kornizës së re të partneritetit, me ç’rast Banka Botërore përgatiti analizë, ku definohen prioritetet për katër vitet e ardhshme”, theksoi ministri Besimi në këtë takim dhe u shpreh i kënaqur nga përkrahja e vazhdueshme e deritashme që vendi ynë ka marrë nga ky institucion financiar ndërkombëtar.
 
Ai shtoi se Korniza e partneritetit, i përmbledh fushat në të cilat banka do të sigurojë përkrahje për axhendën zhvillimore të vendit dhe se partneriteti me bankën përmes kornizës së re, ka rëndësi të veçantë për zhvillimin e mëtejshëm të ekonomisë sonë në rrugën drejt BE-së, me të cilën do të përgatiteten projekte prioritare të rëndësishme të Qeverisë së RMV-së, të pasqyruara në dokumentet strategjike nacionale.
 
Raporti i hartuar nga Banka Botërore, si bazë e Kornizës së re – Diagnostifikimi sistematik i vendit, iu prezantua edhe Qeverisë së RMV-së. Objektivi i Kornizës së re është të arrihet rritje inkluzive, e qëndrueshme dhe e gjelbër në ekonomi. Në këtë kornizë do të inkorporohen prioritetet e Qeverisë, të pasqyruara në dokumentet strategjike nacionale dhe në Programin e rritjes ekonomike, i cili përmban reformat kyçe të miratuara bashkërisht me BE-në.
Në takimin e zhvilluar në Ministrinë e Financave u rishikua shkalla e aktiviteteve reformuese që Qeveria i zbaton për marrjen e përkrahjes buxhetore përmes huasë për politika zhvillimore.

Related posts

Mariçiq: BE-ja duhet të bëjë plan të qartë për zgjerimin e Ballkanit Perëndimor

e-max

Musa Xhaferi: Po kërkojmë llogaridhënie, nuk është tragjike nëse kjo gjeneratë ngel në klasë

e-max

Sulmohet spitali onkologjik në Mykolayiv

e-max