Burime të besueshme i kanë thënë agjencisë së lajmeve reuters se Turqia po vijon sulmet intensive ndaj objektivave në verilindje të Sirisë.
Sulmet vijnë në kuadër të përpjekjeve të saj për të dobësuar ndikimin dhe fuqinë ushtarake të grupeve kurde në rajon, veçanërisht milicisë kurde YPG, të cilën Ankaraja e konsideron si një zgjatim të Partisë së Punëtorëve të Kurdistanit (PKK), e cila është e shpallur organizatë terroriste nga Turqia.
Sipas këtyre burimeve, agjencia turke e inteligjencës ka kryer sulme të suksesshme që kanë shkatërruar një sërë objektivash strategjikë. Në këtë operacion, janë asgjësuar 12 kamionë të ngarkuar me raketa dhe armë të rënda, dy tanke dhe depo të mëdha municionesh, që po transportoheshin nga milicia kurde YPG në zonën verilindore të Sirisë, shkruan skynews.
Turqia prej kohësh ka pasur si prioritet strategjik goditjen e grupeve kurde brenda dhe jashtë kufijve të saj, duke e cilësuar këtë një çështje sigurie kombëtare. Këto operacione ushtarake janë pjesë e një fushate më të gjerë që synon të zhdukë kërcënimet potenciale nga rajonet kufitare dhe të shmangë krijimin e një entiteti autonom kurd pranë kufijve të saj.
Ndërkohë, situata në Siri mbetet komplekse, me fuqi të ndryshme rajonale dhe globale që veprojnë në terren për interesa të ndryshme. Përveç Turqisë, edhe Izraeli dhe Shtetet e Bashkuara të Amerikës kanë ndërmarrë sulme të vazhdueshme në Siri që nga shpërthimi i konfliktit civil dhe rënia e kontrollit të diktatorit Bashar al-Assad në shumë zona të vendit.
Sulmet e tyre janë përqendruar kryesisht në parandalimin e transferimit të armëve kimike dhe atyre të avancuara në duart e grupeve ekstremiste islamike ose në duart e mbështetësve të regjimit sirian, si milicitë e mbështetura nga Irani.
Kjo situatë komplekse ka rritur tensionet në rajon, duke shkaktuar pasiguri dhe duke bërë që konfliktet të zgjaten, ndërsa vendet e prekura vazhdojnë të përballen me pasojat e rënda humanitare dhe politike.
Burimi: botasot.info
