Zëvendëskryeministri Arben Fetai ka njoftuar se nga 15 shtatori automjetet shtetërore dhe komunale në Maqedoninë e Veriut do të pajisen me targa të reja me ngjyrë të veçantë, kuq e verdhë, që do të jenë të dukshme dhe lehtësisht të identifikueshme nga qytetarët dhe mediat.
Sipas Fetait, procesi po zbatohet nga Shërbimi për Punë të Përgjithshme dhe të Përbashkëta i Qeverisë, me përfshirjen aktive të kabinetit të tij, si pjesë e një përpjekjeje për të forcuar transparencën dhe llogaridhënien në administratën publike.
Sistemi i ri pritet të përfshijë rreth 7.000 deri 7.500 automjete shtetërore dhe komunale në gjithë territorin e vendit. “Ky hap është pjesë e një përpjekjeje të gjerë për të ndaluar keqpërdorimin e automjeteve zyrtare për qëllime partiake ose private, sidomos gjatë periudhave zgjedhore, praktikë kjo që ka qenë shpesh objekt kritikash në opinionin publik”, ka shkruar Fetai.
