“Pas shuarjes ekspres të ‘kryengritjes” së BDI-së, Aliut, hoxhës me dëshirë për t’u bërë politikan, Fukit, kriminelëve që presin të ndërtojnë ndërtime në Butel dhe disa strukturave të tjera, BDI nga shovinizmi i hapur kaloi në gënjeshtra jashtëzakonisht të lira, të cilat herën tjetër në zgjedhjet lokale do t’i çojnë drejt një shuarjeje edhe më të ashpër të “kryengritjes kriminale.” Kështu ka shkruar sot në faqen e tij zyrtare në facebook, kryetari i Komunës së Butelit, Darko Kostovski, duke reaguar ashpër ndaj akuzave të BDI-së se gjoja dita e Alfabetit Shqiptar nuk është shënuar shkollat fillore ku mësojnë nxënës shqiptarë.
Kostovski akuzoi BDI-në se pas “dështimit të kryengritjes së rreme politike”, po përpiqet të krijojë skandale të paqena përmes portaleve, duke përdorur, siç tha ai, “shovinizëm, gënjeshtra dhe narrativë kriminale për të sulmuar zhvillimin e Butelit”.
Sipas Kostovskit, projektet dhe dinamika e punëve në komunën e Butelit nuk mbulohen dot nga asnjë manipulim apo shpifje.
“Paaftësia, tendencat kriminale dhe shovinizmi gjithmonë janë mbrojtur me gënjeshtra të hapura,” ka shkruar më tej Kostovski, duke paralajmëruar se rezultati i ardhshëm zgjedhor do të jetë edhe më i ashpër për kundërshtarët politik.
Në fund, kryetari i Butelit Darko Kostovski u bëri thirrje qytetarëve të mos bien pre e dezinformatave, duke shtuar: “Buteli e di.”