Kryeministri izraelit Benjamin Netanyahu ka publikuar në rrjetin social X një deklaratë të partisë së tij, Likud, në të cilën pretendohet se zgjedhjet në Izrael janë manipuluar nga partitë arabe, përmes shkeljeve të rënda gjatë procesit të votimit.
Në deklaratë, Likud akuzon partitë arabe për ryshfet, kërcënime, dhunë, votim të përsëritur dhe mashtrim me identitetin. Partia pretendon se këto shkelje kanë ndodhur në disa qendra votimi në zonat me shumicë arabe dhe se kanë ndikuar në integritetin e procesit zgjedhor.
Likud bëri të ditur se do t’u dorëzojë policisë, shërbimit të sigurisë së brendshme Shin Bet dhe Komisionit Qendror të Zgjedhjeve qindra dëshmi dhe prova që, sipas saj, mbështesin akuzat.
“Zgjedhjet në Shtetin e Izraelit u vodhën nga partitë arabe që mbështesin terrorizmin dhe eliminimin e shtetit hebre përmes veprave të rënda penale të ryshfetit, kërcënimeve, dhunës, falsifikimit dhe përdorimit të softuerëve të ndaluar për të nxitur votuesit. Partia Likud po i ofron policisë, Shin Bet dhe Komitetit Zgjedhor qindra dëshmi dhe prova të vjedhjes së zgjedhjeve në shumë qendra votimi arabe – mijëra zarfe me para në dorë dhe fletë votimi Raam, kërcënime dhe dhunë kundër stafit të qendrave të votimit, votues të shumtë pas perdes, votim me identitete të dyfishta, mospërputhje midis numrit të zarfeve dhe numrit të votuesve, përdorim të softuerëve të ndaluar të votimit dhe më shumë. Ne kërkojmë nga policia dhe Shin Bet një hetim të plotë për vjedhjen e zgjedhjeve nga partitë arabe dhe shtrirjen e plotë të ligjit kundër autorëve. Ne kërkojmë nga Komiteti Zgjedhor një përgjigje të menjëhershme ndaj hetimit të këtyre veprave penale që kanë dëmtuar rrënjësisht pastërtinë e zgjedhjeve në Izrael dhe rezultatet e zgjedhjeve. Kjo është një shkelje serioze e demokracisë izraelite dhe e drejtës së zgjedhjes së qytetarëve izraelitë. Agjencitë zbatuese duhet të veprojnë me forcë dhe menjëherë”, shkruan Netanyahu.
Burimi:botasot.info
