Shkup, 14 dhjetor – Institucionet shtetërore janë të ngarkuara me të dhëna publike prandaj ata mbeten sektori më i rrezikuar dhe ekspozuar ndaj krimeve kibernetike shkroi në facebook Ministri i Shoqërisë Informatike dhe Administratës, Admirim Aliti.
Ai sot mori pjesë në punëtorinë e organizuar nga Microsoft për institucionet shtetërore në Maqedoninë e Veriut, me ç’rast u trajtuan sfidat, kërcënimet dhe përgjigja e institucioneve në raport me sigurinë kibernetike, mobilitetin dhe infrastrukturën e tyre.
“Fakti që qeveria, respektivisht institucionet shtetërore janë të ngarkuara me të dhëna publike, ata mbeten sektori më i rrezikuar dhe ekspozuar ndaj krimeve kibernetike, prandaj përfshirja e sektorit publik dhe privat, përmes edhe punëtorive të tilla, janë thelbësore në krijimin e mundësive dhe modeleve të reja për mbrojtje dhe parandalim të sulmeve të tilla” shkruan në facebook ministri.
Sipas tij MSHIA përveç angazhimit të saj në krijimin e Strategjisë Nacionale për Siguri Kibernetike, mbështet dhe i bashkëngjitet çdo iniciative që ndihmon vendin në këtë drejtim.
