Deputetja e Partisë Demokratike të Kosovës (PDK), Ariana Musliu-Shoshi, ka njoftuar rikandidimin e saj për Kuvendin e Republikës së Kosovës, ku në listën zgjedhore të PDK-së ajo garon me numrin 18.
Në një komunikim publik, Musliu-Shoshi ka shprehur mirënjohje të thellë ndaj mbështetjes së qytetarëve, duke theksuar se rikandidimi i saj buron nga besimi i vazhdueshëm që ka marrë nga ta, si dhe nga përkushtimi i saj për t’u shërbyer me ndershmëri dhe transparencë.
Ajo ka theksuar se çdo takim me qytetarët, çdo shqetësim i shprehur dhe çdo sfidë e përbashkët kanë forcuar bindjen e saj se vendi ka nevojë për më shumë vizion, punë dhe zë qytetar në vendimmarrje. Musliu-Shoshi ka nënvizuar se angazhimi i saj politik mbetet i orientuar drejt mbrojtjes së interesit publik dhe avancimit të reformave që sjellin zhvillim dhe drejtësi sociale.
Sipas saj, numri 18 në listë simbolizon vendosmërinë dhe energjinë për të sjellë rezultate konkrete, ndërsa u ka bërë thirrje qytetarëve për mbështetje për të përfunduar projektet e nisura dhe për të ndërtuar së bashku një të ardhme më stabile dhe më të drejtë për të gjithë.