Shkup, 25 nëntor – Lëvizja civile “Avaja” sot i dhuroi Poliklinikës Çair një autoambulancë për nevojat e qytetarëve të Shuto Orizares dhe mbështetje financiare për punësimin e dy infermiereve rome në një pjesë të reparteve të Shtëpisë Shëndetësore Shkup.
“Kjo do të rrumbullaksojë të gjithë mbështetjen që ofron “Avaja” për përmirësimin e shëndetit dhe qasjen në shërbime shëndetësore për romët nga Shuto Orizarja”, tha Elvis Shaqiri nga “Avaja” sot gjatë dorëzimit të donacionit.
Vendimi për punësimin e dy infermiereve rome u iniciua vitin e kaluar me nënshkrimin e memorandumit trepalësh ndërmjet Qeverisë, Poliklinikës Çair dhe “Avaja”.
Sipas Shaqirit, punësimi i dy infermierëve pritet të realizohet në janar të vitit 2023.
Me nënshkrimin e memorandumit dhe marrëveshjes së donacionit, Qeveria dhe Poliklinika e Çairit marrin përsipër që pas dy vitesh t’i marrin infermierët në sistemin e rregullt të punësimit.
