Shkup, 16 dhjetor – Banka Qendrore Evropiane (BQE) mori vendim për vazhdimin e mundësisë së Bankës Popullore për të përdorur repo-linjën deri më 15 janar 2024, e cila bankës sonë qendrore i vë në dispozicion likuiditet valutor prej 400 milionë euro për gati një vit tjetër.
Siç kumtoi sot Banka Popullore, repo-linja është vetëm një shtresë tjetër mbrojtëse, duke marrë parasysh nivelin e lartë të rezervave devizore dhe likuiditetin e lartë të bankave, të cilat garantojnë stabilitetin e denarit dhe stabilitetin makrofinanciar. Qasja për përdorimin e këtij instrumenti, theksojnë ata, paraqet edhe një mbështetje të konsiderueshme për politikat e zbatuara nga banka jonë qendrore.
“Bankës Kombëtare iu dha mundësia të përdor repo-linjën në vitin 2020, në fillim të krizës së shkaktuar nga pandemia Kovid-19, kur BQE lejoi qasjen në këtë instrument për bankat qendrore jashtë Eurozonës, për të zbutur efektet negative nga pandemia e shkaktuar nga virusi korona. Banka Popullore ishte lider dhe iniciator në mesin e bankave qendrore të rajonit në sigurimin e qasjes në fonde shtesë, për forcimin e mekanizmave mbrojtës, pavarësisht nivelit të qëndrueshëm të rezervave valutore dhe likuiditetit solid të bankave. Në periudhën e kaluar, përkundër krizës, mjetet nga repo-linja nuk janë shfrytëzuar”, thuhet në njoftimin e Zyrës së Guvernatorit.
Duke pasur parasysh pasigurinë e zgjatur që lind nga lufta e vazhdueshme në Ukrainë dhe pasojat ekonomike dhe financiare të lidhura me ekonominë botërore dhe tregjet financiare, kjo është hera e tretë që Banka Qendrore Evropiane e vazhdon repo-linjën.
Banka Popullore shprehu mirënjohje ndaj BQE-së për vazhdimin e qasjes në repo-linjën.
