Shkup, 14 shtator – Zëvendëskryeministrja përgjegjëse për politika të qeverisjes së mirë, Sllavica Gërkovska, sot ka zhvilluar takim me përfaqësuesit e SIGMA/OECD të udhëhequr nga Bagrat Tunjan, përgjegjës për bashkëpunim ndërmjet SIGMA-s dhe Maqedonisë së Veriut.
Siç informojnë nga shërbimi për shtyp i Gërkovskës, gjatë takimit ajo ka shprehur mirënjohjen e saj për mbështetjen që SIGMA i jep shtetit, veçanërisht në pjesën e definimit të Strategjisë kombëtare për reformat në administratën publike, bashkëpunimin me Sekretariatin e Përgjithshëm të Qeverisë në fushën e planifikimit strategjik, si dhe për reformat në menaxhimin e financave publike.
“Delegacioni i SIGMA-s e informoi zëvendëskryeministren Gërkovska për mbështetjen profesionale që ofrojnë në procesin e harmonizimit të pagave në administratën dhe institucionet shtetërore dhe përcaktimin e kritereve me të cilat paguhen pagat”, thuhet në kumtesë.
Zëvendëskryeministrja Gërkovska theksoi se ky proces është shumë i rëndësishëm dhe se Qeveria është e vendosur në përkushtimin e saj për të përcaktuar kriteret në bazë të të cilave do të përcaktohen pagat në institucionet shtetërore.
Gërkovska theksoi se bashkëpunimi me organizatën SIGMA/OECD është vendimtar, sepse ekspertiza e tyre është e rëndësishme në krijimin e politikave të ardhshme.
