Ambasadori i ShBA-ve në Kosovë, Jeffrey Hovenier, ka deklaruar se duhet të shmanget çdo konflikt i mundshëm nesër gjatë betimit të kryetarëve të rinj të komunave në veri.
Pas takimit me kryeministrin Albin Kurti, Hovenier tha se nuk do të ishte mirë që institucionet e Kosovës të depërtojnë me forcë në ndërtesat e komunave, nëse veç ato nuk janë të qasshme.
“I kam bërë disa komente edhe gjatë ditës së djeshme, të njëjtat i diskutova edhe sot. Shtetet e Bashkuara të Amerikës besojnë se kjo gjë duhet të ndodhë në një mënyrë që shmang konfliktet dhe përplaset që mund të qojnë në rritjen e tensioneve në veri”.
“Ne jemi për zgjidhjen e kësaj çështjeje në mënyrë të mirë, ne nuk mendojmë që është ide e mirë që të përdoret forca për të arritur qasje në ndërtesat që mund të mos jenë të qasshme”, u shpreh Hovenier.
Ndërkohë që nesër është paralajmëruar betimi i kryetarëve shqiptarë të komunave me shumicë serbe në veri të vendit, kryetarë këta që kanë dalë nga procesi zgjedhor i 23 prillit.
Momentalisht, është konfirmuar se do betohet kryetari i ri i Mitrovicës së Veriut i cili vjen nga Lëvizja Vetëvendosje, Erden Atiq.
Për Zveçan, Leposaviq e Zubin Potok, ende nuk ka ndonjë konfirmim zyrtar./Arbresh.info
