Lumir Abdixhiku e zbulon se çfarë i kërkuan ndërkombëtarët për zgjedhjet e Serbisë

Abdixhiku: Na është kërkuar nga ndërkombëtarët që mbajtja e zgjedhjeve të Serbisë të mos bëhet temë politike.
Kryetari i LDK-së, Lumir Abdixhiku, ka thënë se komuniteti ndërkombëtar u ka kërkuar klasës politike në vend që të mos bëhet temë politike mbajtja e zgjedhjeve të Serbisë në Kosovë.
Abdixhiku shton se në këtë rast, mbajtja e relacioneve të mira me aleatët është me rëndësi të madhe.
“Unë shoh vetëm pozicionin e qeverisë në relacion me partneritetin ndërkombëtar. Kjo është me rëndësi. Për të tjerat nuk është e rëndësishme. Unë po them që mënyra se si komunikon me komunitetin ndërkombëtar dhe njerëz që vijnë për enkas për këtë çështje. Për referendumin e kemi votuar një rezolutë në Kuvend që pozita e ka kërkuar. Unë po them që neve na duhet komunikimi me partneritetin ndërkombëtar”, ka thënë ai.
Abdixhiku po ashtu i thotë kryeministrit Kurti që të mos përplaset me ndërkombëtarët dhe të mbajë lidhjet me aleatët në mënyrë që ata të mos kalojnë në anën e Serbisë.
“Ajo që na është thënë neve është që mos ta bëjmë çështje politike temën e mbajtjes së zgjedhjeve të Serbisë. Pra mos ta bëjmë çështje të përplasjeve të brendshme. Kemi gjëra më të mëdha me të cilat mund të merremi se sa tavolinat e brendshme këtu. Kemi një rezolutë që e kemi votuar në parlament. kemi një qeveri që ka dhënë mesazh të vazhdueshëm në kauzat e veta në këtë çështje. Kemi një praktikë të mbajtjes së zgjedhjeve në partneritetin me ndërkombëtarët. Është përgjegjësi e vetme e qeverisë, e kryeministrit në këtë rast, këto fjalë të mëdha të tij t’i trajtojë e të mësoj nga realpolitika e vërtetë. Unë mund të them se partneriteti ndërkombëtar është shumë i rëndësishëm. Nuk na duhet një përplasje me ndërkombëtarët dhe dërgimi i aleatëve tanë tek Vucici”, shtoi ai në emisionin Pressing në T7.