Shkup, 19 Shtator – Faqja e Ministrisë së Arsimit dhe Shkencës (MASH) prej ditësh nuk është në funksionon. Nëse provoni ta hapni, do të merrni një mesazh që faqja nuk është në dispozicion: “This site can’t be reached. Мon.gov.mk took too long to respond.”.
Meta.mk në periudhën e kaluar, ka shkruar disa herë për rënien e ueb-faqes së MASH-it, e cila për herë të parë nuk ishte në dispozicion 18 gusht, e më pas në ditët në vijim “binte” disa herë dhe kthehej në funksion.
Pas sulmit të hakerëve që ndodhi më pak se dy javë më parë, e prapa të cilit dyshohet kinse qëndron një ekip hakerësh grek, qasja në faqen e kësaj ministrie është pamundësuar. Nga MASH thonë se rasti është raportuar dhe se aktualisht po punohet në forcimin e sigurisë së ueb-faqes.
Nga kjo ministri, disa ditë më parë, kanë bërë të ditur se akomodimi në konviktet studentore për studentët e vitit të parë është në zhvillim e sipër dhe se aplikimi bëhet në mënyrë elektronike, përmes portalit “e-shërbime” (e-uslugi). Këtu, studentët e vitit të parë mund ta gjejnë Konkursin, i cili është në dispozicion nga sot, si dhe dokumentet e nevojshme që duhet të shkarkohen, plotësohen dhe ngarkohen në aplikacion. Lista përfundimtare e studentëve të pranuar do të publikohet më 30 shtator në tabelat e shpalljeve në konvikte dhe në faqen e MASH-it, e cila aktualisht nuk funksionon.
