Adnan Šerak është arrestuar në zonën e Policisë Mostar Veri, pasi ndaj tij ishte shpallur kërkim operativ nga Ministria e Punëve të Brendshme e Kantonit të Sarajevës.
Sipas mediave boshnjake, Šerak konsiderohet person i njohur për organet e sigurisë dhe drejtësisë në Bosnje dhe Hercegovinë, me një dosje të rëndë penale që përfshin vrasje, tentim vrasjeje dhe privim të paligjshëm të lirisë.
Policia e Mostarit e kishte lokalizuar të enjten mbrëma automjetin në të cilin ndodhej ai, ndërsa aksioni u realizua nga Sektori i Policisë Kriminale i MPB-së së HNK-së me mbështetjen e njësive speciale dhe stacioneve policore lokale.
Pas ndalimit të automjetit, Šerak arriti të largohej nga vendi i ngjarjes, por më pas u arrestua. Dy persona nga Sarajeva, që ndodheshin në veturë me të, janë ndaluar dhe po hetohen nën dyshimin se e kanë ndihmuar.
Šerak ishte dënuar më herët për disa vepra të rënda penale. Në vitin 2009 ai u dënua me tetë vjet e gjysmë burg për tentim vrasjeje në një kafene në Sarajevë, ndërsa në dosjen e tij figuron edhe vrasja e Dženan Džakës.
Ai ishte bërë i njohur edhe pas arratisjes nga burgu i Zenicës në vitin 2018, kur u kap pas më shumë se një muaji në arrati.
Në vitin 2023, Gjykata Komunale e Sarajevës e dënoi me një vit burg për privim të paligjshëm të lirisë dhe shkaktim të lëndimeve të lehta trupore. Nga burgu ishte liruar në tetor të vitit të kaluar.
