Shkup, 19 dhjetor – Rezultatet e Thirrjes së dytë për ndarjen e granteve për zhvillim të shërbimeve sociale në nivel lokal sot, në orën 14, do të prezantohen në Klubin e deputetëve.
Në këtë ngjarje, ku do të marrin pjesë ministrja e Punës dhe Politikës Sociale Jovanka Trençevska, menaxherja e Projektit për përmirësimin e shërbimeve sociale Elizabeta Kunovska dhe përfaqësues të komunave, do të nënshkruhen marrëveshjet për grante me përfaqësues të ofruesve të përzgjedhur të shërbimeve dhe komunave.
Thirrja e dytë për zhvillimin e shërbimeve sociale në nivel lokal është pjesë e Projektit për përmirësimin e shërbimeve sociale që e zbaton Ministria e Punës dhe Politikës Sociale me mbështetjen e Bankës Botërore.
“Përmes këtij projekti, me ndarjen e granteve, kontribuohet në zgjerimin dhe përmirësimin e cilësisë së shërbimeve sociale në nivel lokal, si dhe në rritjen e fushëveprimit të shërbimeve”, thonë nga MPPS.
Përmes thirrjes së parë janë realizuar 22 projekte në 27 komuna, bëjnë të ditur nga Ministria.
