Shkup, 10 tetor – Qeveria në mbledhjen e sotme të 89-të konfirmoi dy propozim-ligje për ratifikimin e marrëveshjeve, të propozuara nga Ministria e Punëve të Jashtme, të cilat kanë të bëjnë me marrëveshjet e nënshkruara gjatë bashkëpunimit në kuadër të nismës “Ballkani i Hapur”.
Siç bëri të ditur shërbimi për informim i Qeverisë, është konfirmuar Propozimi i ligjit për ratifikimin e Marrëveshjes mes vendeve të Ballkanit Perëndimor nga sfera e njohjes së ndërsjellë të diplomave dhe niveleve shkencore të dhëna nga institucionet e arsimit të lartë dhe institucione të tjera të autorizuara, qëllimi i të cilave është që të lehtësohen procedurat e njohjes.
“Kjo është paraparë përmes lehtësimit të bashkëpunimit institucional në sferën e njohjes së diplomave dhe niveleve shkencore nga arsimi i lartë, të fituara në vendet e palëve të dakorduara, mes zyrave ENIC/NARIC”, bëhet e ditur në kumtesën nga mbledhja e Qeverisë.
I dyti është Propozimi i ligjit për ratifikimin e Marrëveshjes për bashkëpunim në mbrojtjen nga katastrofat në Ballkanin Perëndimor, qëllimi i të cilave është që palët dakorduese, në përputhje me kapacitetet e tyre adekuate në dispozicion, ta ndihmojnë njëra-tjetrën, në rast të katastrofave, kur pala dakorduese kërkues, nuk është në gjendje të përballet me pasojat nga katastrofa, duke i shfrytëzuar resurset e veta.
